ព័ត៌មានអន្ដរជាតិ

ហេសបូឡា ប្រការជំហរក្ដៅគគុក «បើវាយប្រហារអ៊ីរ៉ង់ ដូចវាយប្រហារពួកគេដែរ»

បានផុស

៦ ខែ មុន

នៅ

ថ្ងៃអង្គារ ២៧ មករា ២០២៦

ដោយ

នៅក្នុងសុន្ទរកថាតាមទូរទស្សន៍នៅឯការជួបជុំមួយដែលមានគោលបំណងសាមគ្គីភាពជាមួយអ៊ីរ៉ង់កាលថ្ងៃទី ២៦ ខែមករា មេដឹកនាំលោក Naim Qassem បានចេញសារដ៏ក្តៅគគុកថា ហេសបូឡា និងអ្នកគាំទ្ររបស់ខ្លួនកំពុងប្រឈមមុខនឹងការវាយប្រហារដែលមិនរើសអើងរវាងនរណាម្នាក់ និងអ្នកណាទេ ប្រសិនបើអ៊ីរ៉ង់ត្រូវបានវាយប្រហារ នោះសង្គ្រាមទាំងស្រុងនឹងកើតឡើងពិតមែន។

**លោក Naim Qassem មេដឹកនាំក្រុមហេសបូឡា (REUTERS)**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំរូបនេះមានប្រសាសន៍ថា «សង្គ្រាមប្រឆាំងនឹងអ៊ីរ៉ង់នៅពេលនេះ នឹងបង្កឲ្យមានជម្លោះក្នុងតំបន់។ រហូតមកដល់ពេលនោះ យើងនឹងជ្រើសរើសពីរបៀបធ្វើសកម្មភាព ប៉ុន្តែហេសបូឡានឹងមិនអព្យាក្រឹតទេ។ ស្ថានភាពនៃអរិភាពនឹងកំណត់ពីរបៀបដែលយើងធ្វើសកម្មភាព។ ហេសបូឡានឹងធ្វើការសម្រេចចិត្តដោយផ្អែកលើផលប្រយោជន៍ដែលពាក់ព័ន្ធ»។ នេះបើយោងតាមសារព័ត៌មាន aljazeera បានចុះផ្សាយ។

លោក Qassem ថែមទាំងអះអាងបន្ថែមដោយលើកឡើងនៅក្នុងរយៈពេលពីរខែកន្លងមកនេះ តាមរយៈអ្នកសម្របសម្រួល ហេសបូឡាបានទទួល «សំណួរច្បាស់លាស់ និងមិនច្បាស់លាស់» អំពីលទ្ធភាពនៃក្រុមប្រដាប់អាវុធក្នុងការធ្វើអន្តរាគមន៍ ប្រសិនបើសហរដ្ឋអាមេរិក និងអ៊ីស្រាអែលបានធ្វើសង្គ្រាមជាមួយអ៊ីរ៉ង់។ ដោយហេតុថា ពួកគេចង់ឲ្យយើងប្តេជ្ញាមិនជ្រៀតជ្រែក។ ជាពិសេស ការប៉ុនប៉ងធ្វើឃាតលោក Khamenei ណាមួយនឹងធ្វើឲ្យប៉ះពាល់ដល់ស្ថិរភាពក្នុងតំបន់ និងពិភពលោក ដោយចាត់ទុកការគំរាមកំហែងបែបនេះថាមានគោលដៅមកលើពួកគេផងដែរ។

សេចក្តីថ្លែងការណ៍របស់មេដឹកនាំហេសបូឡារូបនេះបានកើតឡើង បន្ទាប់ពីប្រធានាធិបតីអាមេរិក ដូណាល់ ត្រាំ បានប្រកាសថា កងនាវាធំមួយកំពុងធ្វើដំណើរឆ្ពោះទៅកាន់អ៊ីរ៉ង់។ ប៉ុន្តែ មេដឹកនាំអាមេរិកហាក់ដូចជាបានបោះបង់ចោលគំនិតនៃការអន្តរាគមន៍យោធានៅក្នុងប្រទេសអ៊ីរ៉ង់ ដោយអះអាងវិញថា វានៅតែជាជម្រើសមួយដែលត្រូវពិចារណា។

សូមជម្រាបជូនថា ហេសបូឡាកាលពីថ្ងៃទី ២៦ ខែមករា បានអំពាវនាវដល់អ្នកគាំទ្រឲ្យប្រមូលផ្តុំគ្នានៅក្នុងបន្ទាយរបស់ក្រុមនេះនៅទូទាំងប្រទេសលីបង់ ដើម្បីបង្ហាញការគាំទ្រដល់អ៊ីរ៉ង់ នៅចំពោះមុខការបំផ្លិចបំផ្លាញ និងការគំរាមកំហែងពីសអាមេរិក និងអ៊ីស្រាអែល។ មនុស្សមួយចំនួននៅតំបន់ជាយក្រុងភាគខាងត្បូងនៃទីក្រុងបេរូត បានលើករូបថតរបស់មេដឹកនាំកំពូលអ៊ីរ៉ង់ អាលី ខាមេនី ក៏ដូចជាហេសបូឡា និងទង់ជាតិអ៊ីរ៉ង់ ហើយបានស្រែកពាក្យស្លោកប្រឆាំងសហរដ្ឋអាមេរិកពេញទំហឹង។

អត្ថបទ៖ សាង ស្រីល័ក្ខ

ចុចអានខាងក្រោមនេះ៖