ចិនសន្យាផ្តល់ការគាំទ្រដល់គុយបា ក្រោយមានការគំរាមកំហែងកាន់តែខ្លាំងពីអាមេរិក

រដ្ឋាភិបាលចិនបានប្តេជ្ញាក្នុងការផ្តល់ «ការគាំទ្រ និងជំនួយ» ដល់ប្រទេសគុយបា ដើម្បីឆ្លើយតបទៅនឹងការគំរាមកំហែងជាបន្តបន្ទាប់ពីសហរដ្ឋអាមេរិក។ នេះ​បើ​យោង​​តាម​ការ​ចុះ​ផ្សាយ​របស់​ទីភ្នាក់ងារ​ព័ត៌មាន AFP។

នៅក្នុងសន្និសីទសារព័ត៌មានមួយ អ្នកនាំពាក្យក្រសួងការបរទេសចិន លោក Guo Jiakun បានសម្តែងការព្រួយបារម្ភយ៉ាងខ្លាំងចំពោះសកម្មភាពចុងក្រោយរបស់ទីក្រុងវ៉ាស៊ីនតោន រួមទាំងការទម្លាក់មេដឹកនាំវ៉េណេស៊ុយអេឡា លោក នីកូឡាស ម៉ាឌូរ៉ូ ដែលជាសម្ព័ន្ធមិត្តដ៏សំខាន់របស់ទីក្រុងហាវ៉ាណា បន្ទាប់ពីការវាយប្រហារតាមអាកាសដ៏សាហាវរបស់អាមេរិកកាលពីដើមខែមករា​នេះ។ លោក Guo បានជំរុញ​ឲ្យ​​អាមេរិកដកការហ៊ុមព័ទ្ធសេដ្ឋកិច្ច ដែលបានអនុវត្តរាប់ទសវត្សរ៍មកហើយនោះចេញជាបន្ទាន់ និងបញ្ឈប់សកម្មភាពដែលបំផ្លាញស្ថិរភាពក្នុងតំបន់ ដោយបានបញ្ជាក់ជាថ្មីនូវសម្ព័ន្ធមិត្តសង្គមនិយមដ៏យូរអង្វែងរបស់ចិនជាមួយប្រទេសដែនកោះមួយនេះ។

ភាពតានតឹងបានឈានដល់ចំណុចរបត់ដ៏សំខាន់មួយ ខណៈដែលប្រធានាធិបតីអាមេរិក ដូណាល់ ត្រាំ បានព្រមានថាគុយបា «ជិតដល់ពេលដួលរលំហើយ» ដោយបានដាក់សម្ពាធលើរដ្ឋាភិបាលទីក្រុងហាវ៉ាណាឲ្យ «ធ្វើកិច្ចព្រមព្រៀង» បើមិនដូច្នេះទេនឹងត្រូវប្រឈមមុខនឹងផលវិបាកដូចអ្វីដែលបានកើតឡើងនៅវ៉េណេស៊ុយអេឡា។ របាយការណ៍បានបង្ហាញថា រដ្ឋបាលលោកត្រាំ កំពុងពិចារណាលើការហ៊ុមព័ទ្ធផ្លូវទឹក ដើម្បីកាត់ផ្តាច់ការនាំចូលប្រេងទៅកាន់គុយបា ដែលជាយុទ្ធសាស្ត្រក្នុងគោលបំណងបង្ខំ​ឲ្យរដ្ឋាភិបាលគុយបាជួបវិបត្តិថាមពល។

ជាការឆ្លើយតបទៅនឹងការគំរាមកំហែងនៃសកម្មភាពយោធា ឬសេដ្ឋកិច្ច ប្រធានាធិបតីគុយបា លោក Miguel Diaz-Canel កាលពីពេលថ្មីៗនេះ បានចុះពិនិត្យដោយផ្ទាល់នូវសមយុទ្ធយោធាទ្រង់ទ្រាយធំ ដោយបានចាត់ទុកសមយុទ្ធទាំងនោះថាជាវិធានការរារាំងចាំបាច់ ដើម្បីការពារអធិបតេយ្យភាពជាតិ៕

ប្រែសម្រួល៖ ឈាង