ព័ត៌មានអន្ដរជាតិ

ហ្វីលីពីន៖ អាស៊ានបដិសេធទទួលស្គាល់លទ្ធផលបោះឆ្នោតនៅមីយ៉ាន់ម៉ា

បានផុស

៣ ខែ មុន

នៅ

ថ្ងៃសុក្រ ៣០ មករា ២០២៦

ដោយ

Chheang

សមាគមប្រជាជាតិអាស៊ីអាគ្នេយ៍ (អាស៊ាន) បានបដិសេធទទួលស្គាល់ភាពស្របច្បាប់នៃការបោះឆ្នោតសកល ដែលទើបតែបញ្ចប់ទៅនៅក្នុងប្រទេសមីយ៉ាន់ម៉ាដែលគ្រប់គ្រងដោយរបបយោធា។ នេះជាប្រសាសន៍របស់រដ្ឋមន្ត្រីក្រសួងការបរទេសហ្វីលីពីន លោកស្រី Theresa Lazaro ដែលត្រូវយកទៅចុះផ្សាយដោយទីភ្នាក់ងារព័ត៌មានរ៉យទ័រ នាថ្ងៃទី៣០ខែមករាឆ្នាំ២០២៦។

*លោកស្រី Theresa Lazaro (រូបថត៖ SunStar Cebu)*

ថ្លែងក្នុងកិច្ចប្រជុំរដ្ឋមន្ត្រីអាស៊ានលើកដំបូងសម្រាប់ឆ្នាំ២០២៦នៅទីក្រុងសេប៊ូ លោកស្រី Lazaro បានបញ្ជាក់ថា ប្លុកដែលមានសមាជិក១១ប្រទេសនេះ មិនបានផ្តល់ការយល់ព្រមលើដំណាក់កាលណាមួយនៃដំណើរការបោះឆ្នោតទាំងបីជុំរបស់មីយ៉ាន់ម៉ានោះឡើយ។ រដ្ឋមន្ត្រីហ្វីលីពីន បានកត់សម្គាល់ថា ទោះបីជាគណបក្សសាមគ្គីភាព និងការអភិវឌ្ឍន៍សហភាព (USDP) ដែលគាំទ្រដោយយោធាបានប្រកាសជ័យជម្នះភាគច្រើនរួចហើយក្តី អាស៊ាននៅតែមិនទាន់មានការឯកភាពគ្នាលើលទ្ធផលនេះ ដោយលើកឡើងថា ដំណើរការបោះឆ្នោតទាំងមូលមិនទាន់មានភាពពេញលេញនៅឡើយទេ។

ការសម្រេចចិត្តរបស់អាស៊ាន គឺជាការប៉ះទង្គិចយ៉ាងខ្លាំងដល់កិច្ចខិតខំប្រឹងប្រែងរបស់យោធាមីយ៉ាន់ម៉ា ក្នុងការស្វែងរកភាពស្របច្បាប់ជាអន្តរជាតិ ចាប់តាំងពីការដណ្តើមអំណាចតាមរយៈរដ្ឋប្រហារក្នុងឆ្នាំ២០២១។ កន្លងមក គណបក្ស USDP បានប្រកាសពីផែនការបង្កើតរដ្ឋាភិបាលថ្មីនៅខែមេសា និងកោះប្រជុំសភានៅខែមីនា ប៉ុន្តែមេដឹកនាំក្នុងតំបន់ និងក្រុមសិទ្ធិមនុស្សបានទាត់ចោលការបោះឆ្នោតនេះថា មិនមានភាពសេរី និងអយុត្តិធម៌ ដោយសារតែការផាត់ចេញនូវគណបក្សប្រឆាំងធំៗ។

ពាក់ព័ន្ធនឹងការលើកឡើងនេះ រដ្ឋមន្ត្រីការបរទេសសិង្ហបុរី លោក Vivian Balakrishnan ក៏បានសង្កត់ធ្ងន់ផងដែរថា វឌ្ឍនភាពដ៏មានអត្ថន័យ ទាមទារឲ្យមានកិច្ចសន្ទនាពីគ្រប់ភាគីទាំងអស់ និងការបញ្ឈប់អរិភាព ដែលលក្ខខណ្ឌទាំងនេះគឺជាការចាំបាច់សម្រាប់រដ្ឋាភិបាលណាមួយក្នុងការទទួលបានការគាំទ្រពីប្រជាជន និងភាពស្របច្បាប់៕