អភិបាលក្រុងបាងកក ស្នើឲ្យបុគ្គលិករដ្ឋនិងឯកជនធ្វើការពីផ្ទះ ព្រោះខ្យល់ពុលធ្ងន់ធ្ងរពេក

ស្ថានភាពខ្យល់ពុលនៅប្រទេសថៃ មិនធូរស្រាលទេ ហើយកាន់តែធ្ងន់ធ្ងរលើសដើម ដោយពេលនេះដល់ថ្នាក់អភិបាលក្រុងបាងកក ណែនាំឲ្យបុគ្គលិករដ្ឋនិងឯកជនធ្វើការពីផ្ទះចាប់ពីថ្ងៃទី២៩ដល់ចុងសប្តាហ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod នៅថ្ងៃពុធទី២៨ខែមករាឆ្នាំ២០២៦ លោក Chatchart Sittipunt និយាយថា កំហាប់ភាគល្អិត PM2.5 នៅបាងកក និងខេត្តជុំវិញ បានកើនឡើងខ្លាំង ជាពិសេសនៅតំបន់ភាគខាងកើតនៃទីក្រុង។

លោក Chatchart បន្តថា មូលហេតុគឺបណ្តាលមកពីការដុតកាកសំណល់កសិកម្ម (ជីវម៉ាស់) ក្នុងខេត្តដែលស្ថិតនៅផ្នែកខាងលើនៃទិសខ្យល់។ ដូច្នេះលោកស្នើឲ្យបុគ្គលិកទាំងអស់ ធ្វើការពីផ្ទះដើម្បីកាត់បន្ថយការបំពុលខ្យល់។

រឿងនេះកើតឡើងបន្ទាប់ពី ទីភ្នាក់ងារអភិវឌ្ឍន៍បច្ចេកវិទ្យាភូមិសាស្ត្រព័ត៌មាននិងលំហនៃប្រទេសថៃ (Gistda) ប្រកាសថា ស្ថានភាពខ្យល់ពុលនៅថៃ ឈានដល់កម្រិតគ្រោះថ្នាក់ពណ៌ក្រហម ដែលប៉ះពាល់ខ្លាំងដល់សុខភាពមនុស្ស។

គិតត្រឹមម៉ោង៨ព្រឹក ទីក្រុងបាងកកនិងខេត្តចំនួន១៩ ​ត្រូវគ្របដណ្តប់ដោយខ្យល់ពុលក្នុងកម្រិតគ្រោះថ្នាក់ខ្លាំង ក្នុងនោះខេត្ត Samut Sakhon ជាកន្លែងធ្ងន់​ធ្ងរជាងគេ ដោយកំហាប់ភាគល្អិត PM2.5 ហក់ឡើងដល់១១៦.៤មីក្រូក្រាមក្នុងមួយម៉ែត្រគូបនៃខ្យល់ឯណោះ។

ខេត្តផ្សេងទៀត ដែលរងគ្រោះខ្លាំងដោយ PM2.5 កម្រិតធ្ងន់ធ្ងរមានដូចជា៖ Samut Songkhram១០៨.៩ មីក្រូក្រាមក្នុងមួយម៉ែត្រគូបនៃខ្យល់, Nonthaburi ១០២.៨មីក្រូក្រាម, Samut Prakan ១០២.៨មីក្រូក្រាមដូចគ្នា និង Nakhon Pathom ១០១.៤មីក្រូក្រាម ចំណែកបាងកក ១០៤.៧មីក្រូក្រាម៕

អត្ថបទ៖ សុខ សុវណ្ណ