លោក Rubio ទស្សនកិច្ចនៅអឺរ៉ុបកណ្តាល ដើម្បីពង្រឹងចំណងមិត្តភាពឡើងវិញ

រដ្ឋមន្ត្រីការបរទេសអាមេរិក Marco Rubio កាលពីថ្ងៃចន្ទទី១៦ ខែកុម្ភៈ បានសន្យាថា នឹងពង្រឹងកិច្ចសហប្រតិបត្តិការជាមួយអឺរ៉ុបកណ្តាលឡើងវិញ ខណៈដែលលោកបានចាប់ផ្តើមដំណើរទស្សនកិច្ចទៅកាន់ប្រទេសស្លូវ៉ាគី និងហុងគ្រី ដែលមេដឹកនាំអភិរក្សនិយមមានទំនាក់ទំនងកក់ក្តៅជាមួយប្រធានាធិបតី ដូណាល់ ត្រាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមយោងតាមទីភ្នាក់ងារ koreatimes លោក Rubio បាននិយាយថា «ក្រោមការដឹកនាំរបស់ប្រធានាធិបតីត្រាំ រដ្ឋបាលនេះមិនត្រឹមតែហុងគ្រី និងស្លូវ៉ាគីប៉ុណ្ណោះទេ ប៉ុន្តែថែមទាំងអឺរ៉ុបកណ្តាលជាសមាសធាតុសំខាន់នៃរបៀបដែលយើងចូលរួមជាមួយទ្វីប និងពិភពលោក។ យើងមិនត្រឹមតែចូលរួមក្នុងកិច្ចប្រជុំ និងការជួបជុំគ្នាប៉ុណ្ណោះទេ ប៉ុន្តែថែមទាំងក្នុងសកម្មភាពជាក់ស្តែងដែលយើងនឹងធ្វើរួមគ្នាតាមរបៀបដែលមានប្រយោជន៍ដល់ប្រជាជនរបស់អ្នក និងប្រជាជនរបស់យើង»។

ក្នុងអំឡុងពេលទស្សនកិច្ចនៅទីក្រុងប៊ុយដាប៉ែសនេះដែរ ត្រឹមតែប៉ុន្មានសប្តាហ៍មុនការបោះឆ្នោតសភារបស់ប្រទេសហុងគ្រី លោក Rubio បានប្រាប់នាយករដ្ឋមន្ត្រីហុងគ្រី Viktor Orban ថា «ភាពជោគជ័យ» របស់មេដឹកនាំជាតិនិយមរូបនេះ គឺជាភាពជោគជ័យសម្រាប់សហរដ្ឋអាមេរិក។

មិនតែប៉ុណ្ណោះ នៅក្នុងសុន្ទរកថាមួយមុនពេលចាកចេញពីទីក្រុងវ៉ាស៊ីនតោន លោក Rubio បាននិយាយថា លោកត្រាំគាំទ្រយ៉ាងខ្លាំងចំពោះលោក Orban ដែលជាសម្ព័ន្ធមិត្តជិតស្និទ្ធបំផុតរបស់ត្រាំ ហើយត្រូវបានមនុស្សជាច្រើនចាត់ទុកថាជាគំរូសម្រាប់គោលនយោបាយដ៏តឹងរ៉ឹងរបស់ប្រធានាធិបតីអាមេរិកលើអន្តោប្រវេសន៍ និងការគាំទ្រចំពោះអ្នកអភិរក្សនិយមគ្រិស្តសាសនា។

យ៉ាងណាមិញ ដំណើរទស្សនកិច្ចរបស់លោក Rubio គឺជាដំណាក់កាលចុងក្រោយនៃដំណើរទស្សនកិច្ចដ៏ប្រញាប់ប្រញាល់ទៅកាន់អឺរ៉ុប ដោយនៅក្នុងសុន្ទរកថានៅឯសន្និសីទសន្តិសុខទីក្រុងមុយនិច លោកនឹងបន្តទៅជួបសម្ព័ន្ធមិត្តស្តាំនិយមផ្សេងទៀត គឺនាយករដ្ឋមន្ត្រីស្លូវ៉ាគី លោក Robert Fico និងប្រធានាធិបតី Peter Pellegrini ដើម្បីរឹតចំណងមិត្តភាពឡើងវិញ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

រុស្ស៊ី សន្យាថា មិនវាយឆ្មក់អ៊ុយក្រែន នៅថ្ងៃបោះឆ្នោតទេ