ព័ត៌មានអន្ដរជាតិ

អាមេរិកគំរាមប្រើកម្លាំងយោធាជាថ្មីលើអ៊ីរ៉ង់ក្រោយបរាជ័យនៃកិច្ចចរចានុយក្លេអ៊ែរ

បានផុស

២ ខែ មុន

នៅ

ថ្ងៃព្រហស្បតិ៍ ១៩ កុម្ភៈ ២០២៦

ដោយ

សហរដ្ឋអាមេរិកចេញការគំរាមជាថ្មីទៀត ដោយប្រើប្រាស់កម្លាំងយោធាប្រឆាំងនឹងទីក្រុងតេអេរ៉ង់ បន្ទាប់ពីកិច្ចចរចានុយក្លេអ៊ែរជុំទីពីរគ្មានផ្លែផ្កា ខណៈដែលអ៊ីរ៉ង់និងរុស្ស៊ីបានប្រកាសពីការធ្វើសមយុទ្ធកងទ័ពជើងទឹករួមគ្នានៅក្នុងសមុទ្រអូម៉ង់ ដើម្បីទប់ស្កាត់សកម្មភាពឯកតោភាគីណាមួយនៅក្នុងតំបន់។ នេះបើយោងតាម Al Jazeera ចុះផ្សាយថ្ងៃទី១៨ ខែកុម្ភៈ ឆ្នាំ២០២៦ ។

អ្នកនាំពាក្យសេតវិមាន លោកស្រី Karoline Leavitt. The conversation.

យោងតាមអ្នកនាំពាក្យសេតវិមាន អ្នកនាង Karoline Leavitt បាននិយាយនៅថ្ងៃពុធថា៖«សង្ឃឹមថាអ៊ីរ៉ង់នឹងមានភាពវៃឆ្លាតក្នុងការធ្វើកិច្ចព្រមព្រៀងជាមួយប្រធានាធិបតីអាមេរិក លោក ដូណាល់ ត្រាំ» បន្ទាប់ពីលោកត្រាំតាមឃ្លាំមើលកិច្ចចរចាមួយនៅទីក្រុងហ្សឺណែវ ប្រទេសស្វីស ដោយខ្លួនឯងនិងបានបញ្ចប់ដោយមិនមានអ្វីជាសាច់ការច្រើន។

អ្នកនាង Leavitt បានប្រាប់អ្នកយកព័ត៌មានថា៖ «ខណៈដែលមានដំណើរការខ្លះត្រូវបានធ្វើឡើងនៅថ្ងៃអង្គារ ប៉ុន្តែយើងនៅតែបន្តតាមដានពីភាពខុសប្លែកលើបញ្ហា(នៃកិច្ចចរចា)មួយចំនួនទៀត»។

ចំណែក លោក ដូណាល់ ត្រាំ បានបញ្ជាក់ឲ្យមានការដាក់ពង្រាយនាវាផ្ទុកយន្តហោះចំនួនពីរគ្រឿង និងកងទ័ពរាប់ពាន់នាក់ទៅកាន់តំបន់ឈូងសមុទ្រនៅមជ្ឈិមបូព៌ា។

លោកបានសរសេរនៅលើបណ្តាញសង្គម Truth Social របស់ខ្លួនថា៖ «ប្រសិនបើអ៊ីរ៉ង់សម្រេចចិត្តមិនព្រមធ្វើកិច្ចព្រមព្រៀងទេ សហរដ្ឋអាមេរិកអាចនឹងប្រើប្រាស់មូលដ្ឋានទ័ពអាកាសមហាសមុទ្រឥណ្ឌានៅកោះ Chagos ដើម្បីលុបបំបាត់ការវាយប្រហារដែលអាចកើតមានដោយរបបមិនស្ថិតស្ថេរ និងគ្រោះថ្នាក់ខ្លាំងនេះ»។

យ៉ាងណាមិញ កិច្ចខិតខំប្រឹងប្រែងចរចាពីមុនបានបរាជ័យកាលពីឆ្នាំមុន នៅពេលដែលអ៊ីស្រាអែលបានបើកការវាយប្រហារលើអ៊ីរ៉ង់ បង្កឱ្យមានសង្គ្រាមរយៈពេល ១២ថ្ងៃ ហើយទីក្រុងវ៉ាស៊ីនតោនបានចូលរួមដោយទម្លាក់គ្រាប់បែកលើទីតាំងនុយក្លេអ៊ែររបស់អ៊ីរ៉ង់ចំនួនបី នៅតំបន់ Fordow, Natanz និង Isfahan។

លោក ដូណាល់ ត្រាំ បានចេញការគំរាមកំហែងជាថ្មីនៃសកម្មភាពយោធាក្នុងខែមករា បន្ទាប់ពីការបង្ក្រាបដ៏ខ្លាំងរបស់អ៊ីរ៉ង់លើក្រុមបាតុករប្រឆាំងនឹងរដ្ឋាភិបាល។

យ៉ាងណា ទីក្រុងតេអេរ៉ង់បានឆ្លើយតបដោយគំរាមកំហែងបិទច្រកសមុទ្រ Hormuz ជាផ្លូវទឹកនាំចេញប្រេងដ៏សំខាន់សម្រាប់ប្រេងក្នុងឈូងសមុទ្រ ព្រមទាំងព្រមានថាអាចវាយប្រហារមូលដ្ឋានយោធាអាមេរិកនៅក្នុងតំបន់ផងដែរ។

ការផ្លាស់ប្តូរនេះ ក្រុមសិទ្ធិមនុស្សមើលឃើញថា បានបង្កើនឱ្យមានការភ័យខ្លាចនៃសង្គ្រាមក្នុងតំបន់ គ្រប់ភាគីគប្បីជំរុញឱ្យមានកិច្ចខិតខំប្រឹងប្រែងលើផ្នែកការទូតរបស់រដ្ឋនៃឈូងសមុទ្រ រួមទាំងអូម៉ង់ កាតា និងអារ៉ាប៊ីសាអូឌីត ដើម្បីទប់ស្កាត់ការកើនឡើងនៃភាពតានតឹង៕

ប្រែសម្រួល៖ ណឺ មិនា