ក្ដីបារម្ភ​ផ្ទុះ​សង្គ្រាមធំ​កើនឡើង ក្រោយ​ការ​​ចរចា​នុយក្លេអ៊ែរ​បញ្ចប់​ដោយគ្មានកិច្ចព្រមព្រៀង

ភាពតានតឹងបានបន្តគ្របដណ្តប់នៅមជ្ឈិមបូព៌ា បន្ទាប់ពីការចរចាដោយប្រយោលរយៈពេលជាច្រើនម៉ោងរវាងអ៊ីរ៉ង់ និងសហរដ្ឋអាមេរិកបានបញ្ចប់ទៅកាលពីថ្ងៃព្រហស្បតិ៍​ទី​២៦​ខែ​កុម្ភៈ​ឆ្នាំ​២០២៦​ដោយគ្មានកិច្ចព្រមព្រៀង ទោះបីជាប្រទេសអូម៉ង់ដែលជាអ្នកសម្របសម្រួលបានរាយការណ៍ពី «វឌ្ឍនភាពគួរឲ្យកត់សម្គាល់» ក៏ដោយ។ នេះ​បើ​យោង​តាម​ការ​ចុះ​ផ្សាយ​របស់​ទីភ្នាក់ងារ​ព័ត៌មាន AP។

ខណៈពេលដែលការពិភាក្សាបច្ចេកទេសនឹងបន្តនៅទីក្រុងវីយែននាសប្តាហ៍ក្រោយ ទីក្រុងតេហេរ៉ង់នៅតែរក្សាជំហររឹងមាំលើសិទ្ធិរបស់ខ្លួនក្នុងការចម្រាញ់អ៊ុយរ៉ាញ៉ូម និងស្នើ​​ឲ្យ​មាន​ការ​​លើកលែងទណ្ឌកម្មអន្តរជាតិ ដោយបដិសេធការទាមទាររបស់ប្រធានាធិបតីអាមេរិក ដូណាល់ ត្រាំ ដែលចង់​ឲ្យ​អ៊ីរ៉ង់បញ្ឈប់កម្មវិធីមីស៊ីល និង​គាំទ្រដល់ក្រុមប្រដាប់អាវុធនានា​​នៅ​ក្នុងតំបន់។

ការបរាជ័យក្នុងការឈានដល់កិច្ចព្រមព្រៀងនេះ បានធ្វើ​ឲ្យ​ការគំរាមកំហែងនៃសង្រ្គាមធំ​ក្នុងតំបន់នៅតែបន្តកើតមាន ស្រប​ពេល​ដែល​​អាមេរិក​កំពុង​ដាក់ពង្រាយកម្លាំងយោធាយ៉ាងច្រើននៅក្បែរ​ប្រទេស​អ៊ីរ៉ង់។ រដ្ឋមន្ត្រីការបរទេសអ៊ីរ៉ង់ លោក Abbas Araghchi បានពិពណ៌នាថា នេះគឺជាជុំនៃការចរចាដែលតានតឹង និងវែងបំផុត ប៉ុន្តែបានព្រមានថា សកម្មភាពយោធាណាមួយរបស់អាមេរិកនឹងធ្វើ​ឲ្យ​មូលដ្ឋានទ័ពអាមេរិកក្លាយជាគោលដៅវាយប្រហារស្របច្បាប់។ លោក Araghchi បានបញ្ជាក់ថា «វា​នឹងមិនមានជ័យជម្នះសម្រាប់នរណាម្នាក់ឡើយ វាគឺជាសង្រ្គាមដ៏បំផ្លិចបំផ្លាញ ដោយលោកបានហៅវាថាជា «សេណារីយ៉ូដ៏គួរឲ្យរន្ធត់» ដែលនឹងទាញតំបន់ទាំងមូលឲ្យធ្លាក់ក្នុងជម្លោះ។

ដ្បិត​រដ្ឋមន្ត្រីការបរទេសអាមេរិក លោក Marco Rubio សម្តែងការព្រួយបារម្ភថា អ៊ីរ៉ង់កំពុងព្យាយាមស្តារកម្មវិធីនុយក្លេអ៊ែររបស់ខ្លួនឡើងវិញ បន្ទាប់ពីការវាយប្រហាររបស់អាមេរិកកាលពីខែមិថុនាឆ្នាំ​មុន​ក៏ដោយ ក៏អ្នកជំនាញខ្លះនៅតែមើលឃើញសញ្ញាវិជ្ជមាន។ លោក Ali Vaez មកពីក្រុមវិបត្តិអន្តរជាតិ (International Crisis Group) បានលើកឡើងប្រាប់ AP ថា ការដែលក្រុមការងារអាមេរិកយល់ព្រមបន្តការពិភាក្សា បង្ហាញថា ភាគីទាំងពីរនៅតែមានចំណុចរួមដែលអាចចរចាគ្នាបាន។ ទោះជាយ៉ាងណាក៏ដោយ ជាមួយនឹងតម្លៃប្រេងដែលកំពុងកើនឡើង និងការគំរាមកំហែងរបស់អ៊ីរ៉ង់ក្នុងការបិទច្រកសមុទ្រ Hormuz សហគមន៍អន្តរជាតិនៅតែបន្តតាមដានយ៉ាងយកចិត្តទុកដាក់ចំពោះលទ្ធភាពនៃយុទ្ធនាការយោធាទ្រង់ទ្រាយធំ៕

ប្រែសម្រួល៖ ឈាង