រុស្ស៊ី ថា អាមេរិកនិងអ៊ីស្រាអែល វាយអ៊ីរ៉ង់ គឺ «មិនត្រឹមត្រូវទាល់តែសោះ»

រុស្ស៊ីបានបន្តរិះគន់មិនសំចៃមាត់ទៅអាមេរិកនិងអ៊ីស្រាអែល ដែលបើកប្រតិបត្តិការយោធាទ្រង់ទ្រាយធំលើអ៊ីរ៉ង់ ដោយបន្ទោសចំៗថា សកម្មភាពរបស់ប្រទេសទាំងពីរគឺ «មិនត្រឹមត្រូវទាល់តែសោះ»។

ការរិះគន់នេះគឺចេញពីមាត់អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova ដែលថ្លែងកាលពីថ្ងៃសុក្រទី៦ខែមីនា និងត្រូវបានផ្សាយបន្តដោយសារព័ត៌មាន RT ថា៖ «ទោះបីជាយើងបានឮការអះអាងពីសំណាក់សហរដ្ឋអាមេរិក និងអ៊ីស្រាអែលថា ពួកគេហាក់ដូចជាកំពុងការពារខ្លួនក៏ដោយ ក៏ការពិតគឺគ្មាននរណាម្នាក់ទៅវាយប្រហារពួកគេទេ ហើយក៏គ្មាននរណាម្នាក់គំរាមកំហែងពួកគេដែរ។ អ៊ីរ៉ង់តែងតែមានឆន្ទៈក្នុងការចូលរួមក្នុងកិច្ចចរចាជាមួយបស្ចិមប្រទេសជានិច្ច»។

លោកស្រីបន្តថា ការវាយប្រហារជាបន្តបន្ទាប់របស់សហរដ្ឋអាមេរិកនិងអ៊ីស្រាអែលទៅលើអ៊ីរ៉ង់ គឺមិនត្រឹមត្រូវឡើយ ដោយហេតុថា សាធារណរដ្ឋឥស្លាមមួយនេះ មិនបានបង្កការគំរាមកំហែងដល់ប្រទេសទាំងពីរទេ។

ពាក់ព័ន្ធការធ្វើឃាតមេដឹកនាំកំពូលអ៊ីរ៉ង់ Ayatollah Ali Khamenei, ក្រសួងការបរទេសរុស្ស៊ី បានថ្កោលទោសថា នេះជាទម្លាប់អ៊ីស្រាអែលដែលតែងធ្វើឃាតនយោបាយ និងតាមប្រមាញ់មេដឹកនាំនៃរដ្ឋអធិបតេយ្យ។

យ៉ាងណា ទាក់ទិនរឿងរុស្ស៊ីនេះដែរ, ទីភ្នាក់ងារ​ព័ត៌មាន​ AP បានដក​ស្រង់​ប្រភព​​ពី​មន្ត្រី​អាមេរិកដែលចោទថា ទីក្រុងមូស្គូបានហុច «ផែនទីបង្ហាញផ្លូវ» នៃព័ត៌មានសម្ងាត់​ឲ្យ​ទៅអ៊ីរ៉ង់ ដើម្បីជួយកំណត់គោលដៅវាយប្រហារលើនាវាចម្បាំង និងយន្តហោះចម្បាំងអាមេរិកនៅមជ្ឈិមបូព៌ា។

ដ្បិត​មន្ត្រីអាមេរិកបញ្ជាក់ពីការលេចធ្លាយព័ត៌មាននេះ សេតវិមានបានបដិសេធចំពោះផលប៉ះពាល់នៃរបាយការណ៍ ដោយអ្នកនាំពាក្យ Karoline Leavitt បានលើកឡើងយ៉ាងដាច់អហង្ការថា វាមិនអាចធ្វើ​ឲ្យប៉ះពាល់ដល់ប្រតិបត្តិការយោធាអាមេរិកឡើយ ព្រោះ «យើងកំពុងកម្ទេចពួកគេទាំងស្រុងហើយ»។

មកទល់ពេលនេះ ក៏មិនទាន់មានប្រតិកម្មឬការឆ្លើយតបពីវិមានក្រឹមឡាំង ចំពោះរបាយការណ៍នេះដែរ៕

អត្ថបទ៖ សុខ សុវណ្ណ