Hegseth ធានាថា អ៊ីរ៉ង់ នឹងចុះចាញ់ ហើយព្រមតាមលក្ខខណ្ឌរបស់ Trump

ក្នុងបទសម្ភាសជាមួយ CBS News នៅថ្ងៃចន្ទទី៩ខែមីនាឆ្នាំ២០២៦ រដ្ឋមន្ត្រីក្រសួងសង្គ្រាមអាមេរិក Pete Hegseth បានធានាថា អ៊ីរ៉ង់នឹងចុះចាញ់ ហើយព្រមតាមលក្ខខណ្ឌរបស់លោកប្រធានាធិបតី Donald Trump។

សម្ភាសក្នុងកម្មវិធី 60 Minutes ដែលផ្សាយបន្តដោយ Daily Mail, លោក Hegseth បានបញ្ជាក់យ៉ាងច្បាស់ថា៖ «យើងកំពុងប្រយុទ្ធដើម្បីជ័យជម្នះ។ វាមានន័យថា យើងគឺជាអ្នកកំណត់លក្ខខណ្ឌ។ យើងនឹងដឹងនៅពេលដែលពួកគេលែងមានសមត្ថភាពប្រយុទ្ធ។ នឹងមានចំណុចមួយដែលពួកគេគ្មានជម្រើសអ្វីក្រៅតែពីចុះចាញ់នោះទេ។ ទោះពួកគេដឹងខ្លួនឬមិនដឹងក៏ដោយ ក៏ពួកគេនឹងក្លាយជាអ្នកដែលគ្មានសមត្ថភាពប្រយុទ្ធទៀតឡើយ។ ពួកគេនឹងចុះចាញ់ជាក់ជាមិនខាន»។

ការអះអាងរបស់លោក Hegseth កើតឡើងស្របពេលអ៊ីរ៉ង់ជ្រើសតាំងកូនប្រុសរបស់លោក Ayatollah Ali Khamenei ឈ្មោះ Mojtaba ឲ្យឡើងកាន់តំណែងជាមេដឹកនាំកំពូលជាផ្លូវការហើយ។

ក្រុមប្រឹក្សាអ្នកជំនាញអ៊ីរ៉ង់ ដែលមានសមាជិក៨៨រូប បានបោះឆ្នោតគាំទ្រលើសពី៥៩សំឡេង ជ្រើសរើសបុរសវ័យ៥៦ឆ្នាំម្នាក់នេះ យ៉ាងប្រញាប់ប្រញាល់តាមរយៈប្រព័ន្ធអនឡាញ ដោយសារស្ថានភាពសង្គ្រាម និងការវាយប្រហារតាមអាកាសពីសំណាក់អាមេរិក និងអ៊ីស្រាអែល។

កូនប្រុសទី២របស់លោក Ali Khamenei ​បានក្លាយជាមេដឹកនាំកំពូលអ៊ីរ៉ង់ទី៣ ចំពេលភ្លើងសង្គ្រាមជាមួយសហរដ្ឋអាមេរិកកាន់តែរីករាលដាលយ៉ាងសន្ធោសន្ធៅ ក្រោយឪពុករបស់ខ្លួនត្រូវបានអ៊ីស្រាអែល ធ្វើឃាត។

យ៉ាងណា ក្រោយការជ្រើសតាំងនោះមិនបានប៉ុន្មានម៉ោងផង ស្រាប់តែលោក Trump ព្រមាន​ខ្លាំងៗ​ថា មេដឹកនាំថ្មីរបស់អ៊ីរ៉ង់ រស់​មិន​បាន​យូរ​ឡើយ បើ​គ្មាន​«ភ្លើងខៀវ» ពីអាមេរិក។

នៅក្នុងកិច្ចសម្ភាស​ជាមួយ ABC News កាល​ពី​ថ្ងៃ​អាទិត្យ​ទី​៨​ខែ​មីនា​ឆ្នាំ​២០២៦ លោក Trump ​បានប្រើភាសានយោបាយបែបវាយប្រហារដោយហៅមេដឹកនាំថ្មីរូបនេះថាជាមនុស្ស «ទន់​ខ្សោយ និងមិនទាន់គ្រប់លក្ខណៈ»។ លោកបញ្ជាក់យ៉ាងច្បាស់ថា បុគ្គលណាដែលឡើងមកបន្តវេនដោយរំលងការយល់ព្រមពីទីក្រុងវ៉ាស៊ីនតោន គឺនឹងមិនអាចរក្សាអំណាចបានយូរអង្វែងឡើយ៕

អត្ថបទ៖ សុខ សុវណ្ណ