ថៃ ប្រកែកថា អ៊ីរ៉ង់ អត់បានព្រមានទេ មុនបាញ់កប៉ាល់ដឹកទំនិញរបស់ខ្លួន

ក្រុមហ៊ុន Precious Shipping Public Company Limited (PSL) ដែលជាម្ចាស់កប៉ាល់ដឹកទំនិញថៃ បានប្រកែកថា អ៊ីរ៉ង់មិនបានចេញការព្រមានជាក់លាក់ណាមួយទេ មុនពេលវាយប្រហារ ទើបកប៉ាល់របស់ខ្លួនសម្រេចធ្វើដំណើរ តាមច្រកសមុទ្រ Hormuz។

តាមការផ្សាយរបស់ The Nation នៅថ្ងៃសុក្រទី១៣ខែមីនាឆ្នាំ២០២៦, PSL បញ្ជាក់ថា ទាំងមុនពេល និងអំឡុងពេលធ្វើដំណើរ កប៉ាល់ Mayuree Naree បានអនុវត្តតាមយ៉ាងម៉ឺងម៉ាត់នូវវិធានការសន្តិសុខ ការណែនាំអំពីសុវត្ថិភាពសមុទ្រ និងរាល់តម្រូវការរាយការណ៍ដែលពាក់ព័ន្ធទាំងអស់។

ក្រុមហ៊ុនបន្តថា កប៉ាល់បានរក្សាទំនាក់ទំនងជាប់ជានិច្ចជាមួយអង្គភាពនៃកងទ័ពជើងទឹកភូមិន្ទអង់គ្លេស (UKMTO), កងទ័ពជើងទឹកថៃ និងមជ្ឈមណ្ឌលសម្របសម្រួលសន្តិសុខសមុទ្រដទៃទៀត។

ការប្រកែកនេះ គឺជាការវាយបកទៅអ៊ីរ៉ង់ ដែលបញ្ជាក់ច្បាស់ៗហើយថា កងឆ្មាំបដិវត្តន៍ (IRGC) បាញ់កប៉ាល់ថៃ ព្រោះតែ មិនព្រមស្តាប់ការព្រមានហើយថែមទាំងផ្គើនថែមទៀត។ តាមការអះអាងរបស់ IRGC, កប៉ាល់នេះ គឺធ្វើដំណើរឆ្លងកាត់តាមច្រកសមុទ្រ Hormuz ដោយខុសច្បាប់។

ទាក់ទិនរឿងនេះដែរ ថៃ បានកោះអញ្ជើញឯកអគ្គរដ្ឋទូតអ៊ីរ៉ង់ដើម្បីឲ្យមកបកស្រាយនិងពន្យល់ ហើយក៏តម្រូវឲ្យភាគីអ៊ីរ៉ង់ ធ្វើការសុំទោសប្រទេសថៃចំពោះហេតុការណ៍នោះផងដែរ។

សូមជម្រាបជាថ្មី កប៉ាល់ត្រូវរងការវាយប្រហារ កាលពីថ្ងៃពុធទី១១ខែមីនាឆ្នាំ២០២៦ អំឡុងពេលធ្វើដំណើរចេញពីកំពង់ផែ ខាលីហ្វា នៃប្រទេសអារ៉ាប់រួម ឆ្ពោះទៅកាន់ប្រទេសឥណ្ឌា។ 

នាវិក២០នាក់ត្រូវបានជួយសង្គ្រោះនិងជម្លៀសដោយសុវត្ថិភាព ទៅកាន់ប្រទេសអូម៉ង់ ប៉ុន្តែ៣នាក់ទៀត នៅតែរកមិនទាន់ឃើញគិតត្រឹមពេលនេះ៕

អត្ថបទ៖ សុខ សុវណ្ណ