ព័ត៌មានអន្ដរជាតិ

ជំនួយការប្រធានាធិបតីរុស្ស៊ី ប្រើសម្តីប្រមាថទីប្រឹក្សាជាន់ខ្ពស់ប្រធានាធិបតីបារាំង

បានផុស

៤ ខែ មុន

នៅ

ថ្ងៃចន្ទ ១៦ មីនា ២០២៦

ដោយ

ទីប្រឹក្សាប្រធានាធិបតីរុស្ស៊ី លោក Yuri Ushakov បានឆ្លើយតបដោយពាក្យជេរប្រមាថ ពេលមន្ត្រីបារាំងលើកឡើងពីលទ្ធភាពនៃការចូលរួមរបស់អឺរ៉ុបក្នុងការចរចាដែលមានគោលបំណងបញ្ចប់សង្គ្រាមរបស់រុស្ស៊ីប្រឆាំងនឹងអ៊ុយក្រែនដែលមានរយៈពេលជាង៤ឆ្នាំនេះ។

យោងតាមកាសែត Financial Times ផ្សាយនៅថ្ងៃទី១៥ ខែមីនា ទីប្រឹក្សាជាន់ខ្ពស់ពីររូបរបស់ប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) បានធ្វើដំណើរទៅកាន់ទីក្រុងមូស្គូកាលពីខែកុម្ភៈ ដើម្បីពិភាក្សាពីការដាក់បញ្ចូលសម្ព័ន្ធមិត្តអឺរ៉ុបក្នុងក្របខ័ណ្ឌចរចានាពេលអនាគតទាក់ទងនឹងសង្គ្រាម។

អ្នកនាំពាក្យវិមានក្រឹមឡាំង លោក Dmitry Peskov និងលោក Yuri Ushakov។ រូបភាព៖ Getty Images

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អំឡុងពេលជួបជាមួយលោក Ushakov ជំនួយការរបស់មេដឹកនាំរុស្ស៊ី អ្នកតំណាងបារាំង បានអះអាងថា រដ្ឋអឺរ៉ុបគួរតែមានកៅអីមួយនៅតុចរចាសន្តិភាព ព្រោះសង្គ្រាមនេះប៉ះពាល់ដោយផ្ទាល់ដល់សន្តិសុខអឺរ៉ុប។

អ្នកការទូតជាន់ខ្ពស់អឺរ៉ុបម្នាក់ប្រាប់សារព័ត៌មាន FT ថា ការឆ្លើយតបរបស់ លោក Ushakov គឺ«ត្រង់ពេក»។

លោក Ushakov ឆ្លើយតបថា៖«សូមអភ័យទោស! ប៉ុន្តែតាមពិតគឺអត់ទេ! យើងមិនមាន (កៅអីចរចា) ទេ! ចូរទៅឋាននរកទៅ»។

ការលើកឡើងនេះបង្ហាញថា វិមានក្រឹមឡាំង បានបដិសេធសំណើនេះទាំងស្រុង ហើយមិនបានបង្ហាញពីឆន្ទៈក្នុងការពង្រីកការចរចា ដើម្បីរួមបញ្ចូលប្រទេសនៅអឺរ៉ុបឡើយ។

ចំណែកអ្នកនាំពាក្យវិមានក្រឹមឡាំង លោក Dmitry Peskov ផ្តល់បទសម្ភាសន៍ទៅកាន់សារព័ត៌មាន FT ថា រដ្ឋាភិបាលអឺរ៉ុបបច្ចុប្បន្នមិនបានរួមចំណែកដល់កិច្ចខិតខំប្រឹងប្រែង ឱ្យមានគោលបំណងបញ្ចប់សង្គ្រាមនោះទេ។

លោក Peskov និយាយថា៖ «ពេលតំណាងមកពីប្រទេសបារាំងមកដល់ គាត់មិនបាននាំមកនូវសញ្ញាវិជ្ជមានណាមួយឡើយ។ ដូច្នេះគាត់មិនបានឮនូវអ្វីវិជ្ជមានជាការឆ្លើយតបទេ។ ជាអកុសល ជនជាតិអឺរ៉ុបកំពុងចំណាយកិច្ចខិតខំប្រឹងប្រែងទាំងអស់របស់ពួកគេ ព្យាយាមបញ្ចុះបញ្ចូលជនជាតិអ៊ុយក្រែនឱ្យបន្តសង្គ្រាម។ យើងជឿជាក់ថាជនជាតិអឺរ៉ុបកំពុងធ្វើខុសពីទស្សនៈនៃអនាគតរបស់ពួកគេ»។

យោងតាមកាសែត FT កិច្ចប្រជុំនេះបានកើតឡើងពេលរដ្ឋាភិបាលអឺរ៉ុបព្យាយាមធានាថា ដំណើរការការទូតទាក់ទងនឹងសង្គ្រាមរបស់រុស្ស៊ីលើអ៊ុយក្រែននឹងរួមបញ្ចូលរដ្ឋសហភាពអឺរ៉ុបដែលបានផ្តល់ការគាំទ្រផ្នែកនយោបាយ យោធា និងសេដ្ឋកិច្ចដល់ទីក្រុងកៀវ ចាប់តាំងពីការចាប់ផ្តើមនៃការឈ្លានពានទ្រង់ទ្រាយធំរបស់រុស្ស៊ីឆ្នាំ២០២២ ៕

ប្រែសម្រួល៖ ណឺ មិនា