ថៃនឹងដាក់ការលុប MoU ព្រំដែន​សមុទ្រជាមួយកម្ពុជា ទៅក្នុងសេចក្តីថ្លែងការណ៍នយោបាយ

យោង​តាម​កាសែត​បាងកក​ប៉ុស្ដិ៍​ ​ចុះផ្សាយ​នា​ថ្ងៃ​ព្រហស្បតិ៍​ទី​២​ខែមេសា​ឆ្នាំ​២០២៦​ នាយករដ្ឋមន្ត្រីថៃ លោក Anutin Charnvirakul បានប្រកាសកាលពីថ្ងៃពុធ​ថា រដ្ឋាភិបាលនឹងបញ្ចូលការលុបចោលអនុស្សរណៈនៃការយោគយល់គ្នាឆ្នាំ​២០០១ ស្តីពីការទាមទារតំបន់សមុទ្រត្រួតស៊ីគ្នាជាមួយកម្ពុជា ឬហៅថា MoU 44 ទៅក្នុងសេចក្តីថ្លែងការណ៍នយោបាយដាក់ជូនសភា។

ខណៈ MoU 44 ត្រូវបានកំណត់ថាត្រូវលុបចោល លោកនាយករដ្ឋមន្ត្រីបានកត់សម្គាល់ថា MoU 43 ដែលជាកិច្ចព្រមព្រៀងព្រំដែនគោកឆ្នាំ២០០០ នៅតែស្ថិតក្រោមការពិចារណានៅឡើយ។ សេចក្តីថ្លែងការណ៍នយោបាយនេះជិតរួចរាល់ហើយ ហើយរំពឹងថានឹងត្រូវដាក់ជូនសភានៅ​ក្នុង​សប្តាហ៍នេះ ដើម្បីធ្វើការពិភាក្សាដេញដោល។

សូម​ជម្រាប​ថា អនុស្សរណៈនៃការយោគយល់គ្នា​ឆ្នាំ២០០០ (MOU 43) ផ្ដោតសំខាន់លើការកំណត់ព្រំដែនគោក និងការបោះបង្គោលព្រំដែនរវាងកម្ពុជា និងថៃ ឲ្យបានច្បាស់លាស់តាមរយៈគណៈកម្មការចម្រុះព្រំដែន (JBC)។ ចំណែកឯ MOU ឆ្នាំ២០០១ (MOU 44) គឺជាក្របខ័ណ្ឌសម្រាប់ដោះស្រាយតំបន់សមុទ្រដែលទាមទារត្រួតគ្នា (OCA) ក្នុងឈូងសមុទ្រថៃ ដើម្បីបើកផ្លូវឲ្យមានការចរចាបែងចែកផលប្រយោជន៍ថាមពល ប្រេង និងឧស្ម័នធម្មជាតិ រួមទាំងការកំណត់បន្ទាត់ព្រំដែនសមុទ្ររវាងប្រទេសទាំងពីរផងដែរ៕

ប្រែសម្រួល៖ ឈាង