សភាអ៊ីរ៉ង់ បោះឆ្នោតរក្សាទុកលោក Ghalibaf ជាប្រធានសភា ១ អាណត្តិទៀត

លោក Mohammad Bagher Ghalibaf ដែលជាប្រធាន​ក្រុម​​អ្នកចរចារបស់ប្រទេសអ៊ីរ៉ង់ ក្នុងកិច្ចចរចាជាមួយសហរដ្ឋអាមេរិក ត្រូវបានជាប់ឆ្នោតឡើងវិញជាប្រធានសភាក្នុងប្រទេស។ នេះបើយោងតាមទីភ្នាក់ងារសារព័ត៌មាន Fars ​គ្រប់គ្រងដោយ​រដ្ឋរបស់អ៊ីរ៉ង់ បានចុះផ្សាយកាលពីថ្ងៃចន្ទ ទី២៤ ខែឧសភា ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Ghalibaf ទទួលបានសំឡេងគាំទ្ររហូតដល់ ២៣៥សំឡេង វ៉ាដាច់​បេក្ខជនស្តាំនិយម លោក Mohammad Taghi Naghdi Ali ដែលទទួលបានត្រឹមតែ ២៩សំឡេង និងតំណាងរាស្ត្រម្នាក់ទៀតគឺលោក Othman Salari ទទួលបាន ៧ សំឡេង ខណៈសន្លឹកឆ្នោតអនុប្បវាទ (សន្លឹកឆ្នោតមិនបាន​ការ​) មានចំនួន ៥ សំឡេង។

ការបោះឆ្នោតនេះ បានប្រព្រឹត្តទៅចំពេលដែលស្ថានភាពនយោបាយនៅក្នុងប្រទេសអ៊ីរ៉ង់ កំពុងមានភាពរសើបខ្លាំង ដោយសារតែកិច្ចចរចាដោយប្រយោលរវាងទីក្រុងតេហេរ៉ង់ និងទីក្រុងវ៉ាស៊ីនតោន កំពុងតែមានសន្ទុះទៅមុខ ហើយការបែក​បាក់ផ្ទៃក្នុងលើគោលនយោបាយការបរទេសក៏ កាន់តែមានភាពស្រួចស្រាល់ផងដែរ។

សូមជម្រាបជូនថា លោក Ghalibaf ដែលជាអតីតមេបញ្ជាការកងឆ្មាំបដិវត្តន៍អ៊ីស្លាម (IRGC) និងជាអតីតអភិបាលក្រុងតេហេរ៉ង់ បានលេចធ្លោឡើង ដោយក្លាយជាតួអង្គកណ្តាលដ៏សំខាន់មួយរូប ចាប់តាំងពីសង្គ្រាមក្នុងតំបន់បានផ្ទុះឡើងកាលពីថ្ងៃទី ២៨ ខែកុម្ភៈ។ លោកបានដើរតួនាទីឈានមុខគេនៅក្នុងការចរចាដោយប្រយោលជាមួយទីក្រុងវ៉ាស៊ីនតោន ហើយក៏ត្រូវបានតែងតាំងជាប្រេសិតពិសេសរបស់អ៊ីរ៉ង់ប្រចាំប្រទេសចិនផងដែរ៕

អត្ថបទ៖ សាង ស្រីល័ក្ខ