ជប៉ុន ពិចារណាផ្ដល់វ៉ាក់សាំងការពារកូវីដដល់ តៃវ៉ាន់ ដែលទើបចាក់បាន ១ ភាគរយប៉ុណ្ណោះដល់ប្រជាជនខ្លួន

រដ្ឋមន្រ្តីក្រសួងការបរទេសជប៉ុន លោក Motegi Toshimitsu បានចង្អុលបង្ហាញថា រដ្ឋាភិបាលនឹងផ្តល់វ៉ាក់សាំងការពារជំងឺកូវីដ ១៩ បន្ថែមដល់ប្រទេស និងតំបន់ផ្សេងទៀតរួមទាំងកោះតៃវ៉ាន់ ផងដែរ ។

លោក Motegi បានថ្លែងបែបនេះ នៅក្នុងសន្និសីទសារព័ត៌មានមួយនៅថ្ងៃសុក្រនេះ បន្ទាប់ពីមានការកត់សម្គាល់របស់ប្រធានាធិបតីតៃវ៉ាន់ លោកស្រី Tsai Ing-wen ។

លោកស្រី Tsai បាននិយាយកាលពីថ្ងៃពុធថា វាកាន់តែមានការលំបាកសម្រាប់តៃវ៉ាន់ ក្នុងការទទួលបានវ៉ាក់សាំងពីក្រុមហ៊ុនឱសថបរទេស ដោយសារតែអន្តរាគមន៍របស់ចិន ។

បច្ចុប្បន្ន កោះតៃវ៉ាន់កំពុងប្រឈមនឹងបញ្ហា នៃការបង្កើនល្បឿនយុទ្ធនាការចាក់វ៉ាក់សាំង ខណៈក៏កំពុងមានការកើនឡើង នូវករណីឆ្លងថ្មីនៃជំងឺកូវីដ ១៩ ចាប់តាំងពីពាក់កណ្តាលខែឧសភានេះមក ហើយគិតត្រឹមពេលនេះ កោះតៃវ៉ាន់ទើបតែបានចាក់វ៉ាក់សាំង ដល់ប្រជាជនរបស់ពួកគេត្រឹមតែ ១ ភាគរយប៉ុណ្ណោះ ។

លោក Motegi បានប្រាប់សន្និសីទកាសែតថា វាមានសារៈសំខាន់ណាស់សម្រាប់ប្រទេស និងតំបន់ទាំងអស់ដែលត្រូវធានាសុវត្ថិភាព សម្រាប់ការទទួលថ្នាំបង្ការប្រកបដោយសុវត្ថិភាព និងប្រសិទ្ធភាព ហើយរដ្ឋាភិបាលជប៉ុន នឹងផ្តល់វ៉ាក់សាំងជាច្រើនទៅដល់ពួកគេ ។

រដ្ឋមន្ត្រីការបរទេសរូបនេះ បានកត់សម្គាល់ថា នៅពេលដែលជប៉ុនរងការវាយប្រហារដោយការរញ្ជួយដី និងរលកយក្សស៊ូណាមិ ឆ្នាំ ២០១១ កោះតៃវ៉ាន់បានផ្តល់នូវការគាំទ្រផ្សេងៗគ្នា ដូចជា ការប្រមូលអំណោយភ្លាមៗ បន្ទាប់ពីគ្រោះមហន្តរាយ ។

លោក Motegi គិតថា តៃវ៉ាន់នឹងនៅតែខ្វះខាតវ៉ាក់សាំង មុនពេលប្រព័ន្ធផលិតកម្មរបស់ខ្លួន ត្រៀមរួចរាល់នៅខែកក្កដា ហើយលោកនឹងពិចារណាផ្តល់ការផ្គត់ផ្គង់ ពីប្រទេសជប៉ុន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ជប៉ុន ត្រៀមប្រើប្រាស់វ៉ាក់សាំង AstraZeneca ហើយនឹងចេញថ្លៃព្យាបាល បើមានករណីដុំកំណកឈាមលើអ្នកចាក់

ចុចអាន ៖ ជប៉ុន​ ហាមចូល​​​អ្នក​ដំណើរ​​ចេញ​ពី​កម្ពុជា​ ថៃ​ និង​ ៥ ប្រទេសទៀត