ព័ត៌មានអន្ដរជាតិ

ល្ងាចមិញ រដ្ឋាភិបាលយោធាមីយ៉ាន់ម៉ាដោះលែងអ្នកតវ៉ារាប់ពាន់នាក់

បានផុស

៥ years មុន

នៅ

ថ្ងៃព្រហស្បតិ៍ ១ កក្កដា ២០២១

ដោយ

អាជ្ញាធរប្រទេសមីយ៉ាន់ម៉ាបានបោះលែងអ្នកតវ៉ាជាង២ពាន់នាក់ពីពន្ធនាគារទូទាំងប្រទេសនៅថ្ងៃពុធ ទី៣០ ខែមិថុនា ម្សិលមិញ ក្នុងនោះមានទាំងអ្នកសារព័ត៌មានផងដែរ។

មីយ៉ាន់ម៉ាបានកើតមានការតវ៉ាយ៉ាងខ្លាំងទូទាំងប្រទេស ហើយការបង្ក្រាបដ៏ឃោឃៅរបស់របបយោធាបានកើតមានឡើង ចាប់តាំងពីរដ្ឋប្រហារកាលពីខែកុម្ភៈដើម្បីបណ្តេញចេញមេដឹកនាំលោកស្រី អ៊ុងសាន ស៊ូជី និងរដ្ឋាភិបាលជាប់ឆ្នោតរបស់លោកស្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមក្រុមឃ្លាំមើលក្នុងស្រុកបានឲ្យដឹងថា ជនស៊ីវិលជាង៨៨០នាក់ត្រូវបានសម្លាប់ក្នុងការបង្ក្រាបដ៏ឃោឃៅរបស់ក្រុមប្រឹក្សារដ្ឋាបាលរដ្ឋ ដែលហៅខ្លួនឯងថាជារដ្ឋាភិបាលយោធា និងមនុស្សប្រហែលជា៦៥០០នាក់ត្រូវបានចាប់ខ្លួន។

បន្ទាប់ពីអាជ្ញាធរបានប្រកាសដោះលែង មនុស្សប្រហែលជា២០០នាក់បានជួបជុំគ្នានៅខាងក្រៅពន្ធនាគារ Insein ក្នុងទីក្រុងយ៉ាំងហ្គោនដើម្បីទទួលសាច់ញាតិរបស់ពួកគេ។ ពួកគេត្រូវបានដាក់របាំងរារាំង ខណៈអ្នកខ្លះកាន់ឆ័ត្រ និងកាន់បាច់ផ្កា។

បុរសម្នាក់ក្នុងចំណោមអ្នករង់ចាំខាងក្រៅពន្ធនាគារបានឲ្យដឹងថា គាត់រង់ចាំទទួលកូនស្រីដែលជាអ្នកតវ៉ាម្នាក់។ គាត់ពិតជាមោទនភាពចំពោះកូនស្រីខ្លួនណាស់ដែលក្លាហាន។

គាត់និយាយថា ៖«ខ្ញុំនឹងជំរុញកូនស្រីរបស់ខ្ញុំឲ្យតស៊ូរហូតដល់ពួកគេទទួលបានជ័យជម្នះ»។

យោងតាមសេចក្តីប្រកាសព័ត៌មានរសប់រដ្ឋាភិបាលយោធាបានឲ្យដឹងថា គិតត្រឹមល្ងាចថ្ងៃពុធម្សិលមិញ អ្នកតវ៉ាចំនួន២២៩៦នាក់ត្រូវបានដោះលែងចេញពីពន្ធនាគារទូទាំងប្រទេស។

ស្ត្រីឈ្មោះ Kay Zon Nway ជាអ្នកកាសែតរបស់សារព័ត៌មានក្នុងស្រុក Myanmar Now ស្ថិតក្នុងចំណោមអ្នកត្រូវបានដោះលែងចេញពីពន្ធនាគារ Insein។ នាងបាននិយាយថា នាងឆ្លងកាត់រឿងរ៉ាវច្រើនណាស់នៅក្នុងគុក ប៉ុន្តែនាងបញ្ជាក់ថានឹងពន្យល់ពេលក្រោយ។

ចំណែកអ្នកកាសែតអាមេរិកឈ្មោះ Danny Fenster កំពុងស្ថិតនៅក្នុងពន្ធនាគារនេះដែរ និងមិនទាន់ដោះលែងទេ បន្ទាប់ពីបានឃុំខ្លួនកាលពីថ្ងៃទី២៤ ខែឧសភា។

ក្នុងចំណោមអ្នកដោះលែងម្សិលមិញនេះ គ្មានជនបរទេសឡើយ។

កាលពីខែកុម្ភៈ រដ្ឋាភិបាលយោធាមីយ៉ាន់ម៉ាបានដោះលែងអ្នកទោសប្រមាណ២៣០០០នាក់មានទាំងក្រុមសិទ្ធិមនុស្សផង។

មេដឹកនាំបណ្តេញចេញ លោកស្រី អ៊ុងសាន ស៊ូជី ដែលឃុំឃាំងនៅក្នុងផ្ទះតាំងពីរដ្ឋប្រហារមកបានស្នើសុំដល់ប្រជាជនមីយ៉ាន់ម៉ាឲ្យរក្សាសាមគ្គីគ្នាដើម្បីប្រឈមនឹងរបបដឹកនាំយោធា។ មេធាវីរបស់លោកស្រីត្រូវបានបញ្ជូនទៅកាលពីថ្ងៃអង្គារ៍ ខណៈលោកស្រីត្រូវឡើងតុលាការរដ្ឋាភិបាលយោធាទៀត៕

ប្រែសម្រួល៖ វីរបុត្រ
ប្រភព៖ AFP