អ៊ូហាន ត្រៀមធ្វើតេស្តប្រជាជនក្នុងទីក្រុងទាំងអស់ ខណៈកូវីដត្រឡប់មកវិញ

អាជ្ញាធរនៅទីក្រុងអ៊ូហាននៅថ្ងៃអង្គារនេះបាននិយាយថា ពួកគេនឹងធ្វើតេស្តប្រជាជននៅក្នុងទីក្រុងនេះទាំងមូល ដើម្បីរកមើលជំងឺកូវីដ ១៩ បន្ទាប់ពីទីក្រុងភាគកណ្តាលប្រទេសចិនដែលផ្ទុះជំងឺកូវីដ ១៩ បានរាយការណ៍ពីករណីឆ្លងក្នុងសហគមន៍លើកដំបូង ក្នុងរយៈពេលជាងមួយឆ្នាំ ។

មន្រ្តីជាន់ខ្ពស់ទីក្រុងអ៊ូហានលោក Li Tao បាននិយាយក្នុងសន្និសីទសារព័ត៌មានមួយនៅថ្ងៃអង្គារនេះថា ទីក្រុងដែលមានប្រជាជនចំនួន ១១ លាននាក់ កំពុងចាប់ផ្តើមធ្វើតេស្តយ៉ាងឆាប់រហ័សលើប្រជាជនទាំងអស់របស់ខ្លួន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្រ្តីក្រុងអ៊ូហានបានប្រកាសកាលពីថ្ងៃចន្ទថា ការឆ្លងក្នុងសហគមន៍ចំនួន ៧ ករណី ត្រូវបានរកឃើញក្នុងចំណោមកម្មករចំណាកស្រុកនៅក្នុងទីក្រុង បន្ទាប់ពីគ្មានករណីឆ្លងក្នុងសហគមន៍ពេញមួយឆ្នាំ ក្រោយទទួលជោគជ័យក្នុងបង្ក្រាបការផ្ទុះឡើងលើកដំបូង ជាមួយនឹងការបិទខ្ទប់មិនធ្លាប់មានពីមុនមក នៅដើមឆ្នាំ ២០២០ ។

ទន្ទឹមនោះ ប្រទេសចិនបានបង្ខាំងប្រជាជននៅទីក្រុងទាំងអស់ ឲ្យស្នាក់នៅគេហដ្ឋានរបស់ពួកគេ កាត់ផ្តាច់ការដឹកជញ្ជូនក្នុងស្រុក និងដាក់ឲ្យប្រើប្រាស់ការធ្វើតេស្តទ្រង់ទ្រាយធំ ក្នុងរយៈពេលប៉ុន្មានថ្ងៃចុងក្រោយនេះ ខណៈដែលប្រយុទ្ធប្រឆាំងនឹងការផ្ទុះឡើងនៃជំងឺកូវីដ ១៩ ដ៏ធំបំផុតរបស់ខ្លួន ក្នុងរយៈពេលប៉ុន្មានខែនេះ ។

នៅអង្គារនេះ ប្រទេសចិនក៏បានរាយការណ៍ពីករណីក្នុងសហគមន៍ចំនួន ៦១ ករណីផងដែរ ខណៈការផ្ទុះឡើងនៃវីរុសបំប្លែងខ្លួនឥណ្ឌា “Delta” ដែលកំពុងរីករាលដាលយ៉ាងឆាប់រហ័ស បានទៅដល់ទីក្រុងជាច្រើន បន្ទាប់ពីមានករណីឆ្លងក្នុងចំណោមអ្នកអនាម័យនៅអាកាសយានដ្ឋានក្នុងទីក្រុង Nanjing បានបង្កឲ្យមានករណីឆ្លងជាច្រើននៅទូទាំងប្រទេស ។

ស្របពេលជាមួយគ្នានេះ ទីក្រុងធំៗរួមទាំងទីក្រុងប៉េកាំង ឥឡូវនេះបានធ្វើតេស្តប្រជាជនរាប់លាននាក់ ខណៈពេលដែលបានបិទទ្វារលំនៅដ្ឋាន និងដាក់អ្នកមានទំនាក់ទំនងជិតស្និទ្ធស្ថិតក្រោមការធ្វើចត្តាឡីស័កជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ចិន បិទខ្ទប់ប្រជាជនរាប់លាននាក់ ខណៈ Delta រាលដាលដល់ ខេត្តក្រុង ជាង ៣០