ភ្លៀងធ្លាក់ខ្លាំងនៅ ស៊ីឈួន បង្ខំឲ្យជម្លៀសមនុស្សជាង ៨ម៉ឺននាក់

ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃចន្ទទី៩ ខែសីហានេះថា មនុស្សជាង ៨ម៉ឺននាក់ ត្រូវបានជម្លៀស ដោយសារតែភ្លៀងធ្លាក់ខ្លាំងនិងទឹកជំនន់នៅខេត្តស៊ីឈួន ភាគនិរតីប្រទេសចិន។

កម្ពស់ទឹកនៅតាមដងទន្លេធំៗក្នុងខេត្តនេះ បានឡើងលើសពីកម្រិតប្រកាសអាសន្នទៅហើយ បន្ទាប់ពីមានភ្លៀងធ្លាក់ច្រើន គិតចាប់ពីថ្ងៃសុក្រដល់ថ្ងៃអាទិត្យ។ អត្រាទឹកនៅអាងស្តុកមួយក្នុងទីក្រុង Dazhou ក៏បានឡើងលើសដែនកំណត់ ២.២ម៉ែត្រ ផងដែរ។

សារព័ត៌មាន China News Service បានរាយការណ៍ថា ឥឡូវនេះ មនុស្សជាង ៤៤០,០០០ នាក់ បានរងផលប៉ះពាល់ដោយសារទឹកជំនន់នៅក្នុងទីក្រុងចំនួន ៦ នៅទូទាំងខេត្ត ស៊ីឈួន។

ចំណែកទូរទស្សន៍រដ្ឋ CCTV បានផ្សាយកាលពីថ្ងៃសៅរ៍ថា ភ្លៀងធ្លាក់យ៉ាងខ្លាំង បានបណ្តាលឲ្យខាតបង់សេដ្ឋកិច្ចក្នុងទំហំទឹកប្រាក់ចំនួន ២៥០ លានយ័ន (៣៨.៥៧ លានដុល្លារ) នៅក្នុងខេត្តស៊ីឈួន ដោយផ្ទះចំនួន ៤៥ ខ្នងត្រូវបានបំផ្លាញនិង ១១៨ ខ្នងរងការខូចខាតយ៉ាងធ្ងន់ធ្ងរ។

ប្រទេសចិន តែងតែរងផលប៉ះពាល់ដោយភ្លៀងធ្លាក់ខ្លាំងនៅរដូវក្តៅ ប៉ុន្តែក្រុមអ្នកជំនាញបានព្រមានថា ឥឡូវនេះ ចិនត្រូវតែធ្វើឲ្យប្រសើរឡើងនូវភាពធន់នៃទីក្រុងរបស់ខ្លួន ស្របពេលដែលអាកាសធាតុកាន់តែអាក្រក់ឡើងៗ។

មន្រ្តីផ្នែកអាកាសធាតុរបស់ប្រទេសចិន បានប្រាប់អ្នកយកព័ត៌មានកាលពីសប្តាហ៍មុនថា ការកើនឡើងនៃសីតុណ្ហភាព បានបង្កើនលទ្ធភាពនៃការធ្លាក់ភ្លៀងខ្លាំងនៅទូទាំងពិភពលោក ហើយផលប៉ះពាល់នៅក្នុងប្រទេសចិន ទំនងជាកាន់តែអាក្រក់ទៅ ៗ ក្នុងរយៈពេលប៉ុន្មានឆ្នាំខាងមុខនេះ៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ ព្យុះទីហ្វុង Lupit បង្ខំឲ្យ ចិន ជម្លៀសប្រជាជនជិត ៦ ម៉ឺននាក់ចេញពីខេត្តជាប់មាត់សមុទ្រ