តាលីបង់ វាយបាន២ភាគ៣នៃប្រទេស អាហ្វហ្គានីស្ថាន ហើយចូលកាន់តែកៀកក្រុង កាបុល

ក្រុមតាលីបង់ បានវាយដណ្តើមយកទីក្រុងមួយទៀតហើយ ពីកងកម្លាំងអាហ្វហ្គានីស្ថាន ខណៈក្រុមឥស្លាមនិយមមួយនេះ កំពុងរុលទៅមុខបន្តិចម្តងៗ ចូលកាន់តែកៀករដ្ឋធានី កាប៊ុល។

ទីក្រុង Ghazni គឺជាការដួលរលំចុងក្រោយបង្អស់របស់អាហ្វហ្គានីស្ថាន ខណៈក្រុមយុទ្ធជនតាលីបង់បានថតសកម្មភាពពួកគេ ដើរដង្ហែកណ្តាលទីក្រុងកាលពីព្រឹកថ្ងៃព្រហស្បតិ៍។

អ្នកនាំពាក្យតាលីបង់និយាយថា “ទាហានរដ្ឋាភិបាលមួយចំនួនធំ ត្រូវបានសម្លាប់ហើយ រាប់សិបនាក់ទៀតបានចុះចាញ់”។

ទីក្រុងនេះ ស្ថិតនៅចម្ងាយត្រឹម១២៨គីឡូម៉ែត្រប៉ុណ្ណោះ នៅភាគខាងត្បូងរដ្ឋធានី កាប៊ុលហើយលាតសន្ធឹងលើផ្លូវធំឆ្ពោះទៅភាគខាងត្បូង។

ក្រុមតាលីបង់ បានគ្រប់គ្រងផ្លូវហាយវ៉េសំខាន់ ឆ្ពោះទៅភាគខាងជើងរួចទៅហើយបន្ទាប់ពីដណ្តើមបានទីក្រុង Pul-e Khumri កាលពីដើមសប្តាហ៍នេះ។ វាមានន័យថា ផ្លូវសំខាន់ពីរចូលនិងចេញទីក្រុងឥឡូវនេះ ត្រូវបានបិទទាំងស្រុង។

ទន្ទឹមនឹងនេះ ការប្រយុទ្ធគ្នាបានពុះកញ្ជ្រោលនៅ Lashkar Gah ដែលជាទីរួមខេត្ត Helmand និង Kandahar ដែលជាទីរួមខេត្ត Kandahar។

ឥឡូវនេះ តាលីបង់បានគ្រប់គ្រងពីរភាគបីនៃប្រទេស ខណៈកងកម្លាំងរដ្ឋាភិបាលបានដកថយស្ទើរតែគ្រប់តំបន់ទាំងអស់ លើកលែងតែទីក្រុងកាប៊ុលប៉ុណ្ណោះដែលជាទីក្រុងតែមួយគត់ មិនទាន់ត្រូវបានវាយប្រហារដោយផ្ទាល់៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ សាហាវព្រៃផ្សៃ! ក្រុមតាលីបង់វាយបានទឹកដី ចូលចាប់ស្រីៗតាមផ្ទះ យកទៅបម្រើផ្លូវភេទ