រញ្ជួយដីនៅហៃទី ស្លាប់កើនដល់ ១,២៩៧នាក់ របួស៥,៧០០នាក់

ក្រុមមន្រ្តីហៃទី បានបញ្ជាក់ថា មនុស្សយ៉ាងតិច ១,២៩៧នាក់បានស្លាប់ បន្ទាប់ពីការរញ្ជួយដីកម្រិត ៧.២ រ៉ិចទ័រ វាយប្រហារប្រទេសការ៉ាអ៊ីបមួយនេះ កាលពីថ្ងៃសៅរ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមអ្នកជួយសង្គ្រោះ កំពុងរើកកាយកម្ទេចកម្ទី ក្នុងក្តីសង្ឃឹមស្វែងរកអ្នកនៅរស់រានមានជីវិត។

ផ្ទះ ព្រះវិហារនិងសាលារៀន ស្ថិតក្នុងចំណោមអគារដែលត្រូវកម្ទេច ក្នុងការរញ្ជួយដីនេះ។ មន្ទីរពេទ្យខ្លះ កំពុងណែនតាន់តាប់ដោយអ្នករបួស ហើយត្រូវការការផ្គត់ផ្គង់។

មន្រ្តីនិយាយថា ចំនួនមនុស្សដែលគេមិនដឹងតួលេខ កំពុងបាត់ខ្លួន ហើយប្រហែល ៥,៧០០ នាក់បានរងរបួស។

គ្រោះមហន្តរាយនេះ បង្កឲ្យមានបញ្ហាប្រឈមចំពោះប្រទេសក្រីក្រ ដែលកំពុងជួបប្រទះវិបត្តិនយោបាយ បន្ទាប់ពីការធ្វើឃាតប្រធានាធិបតីរបស់ខ្លួនកាលពីខែមុន។

ភាគនិរតីប្រទេសហៃទី ជាកន្លែងទទួលរងការខូចខាតធ្ងន់ធ្ងរបំផុត ជាពិសេសនៅជុំវិញទីក្រុង Les Cayes។

មជ្ឈមណ្ឌលរញ្ជួយដីអាមេរិក (USGS) បាននិយាយថា ចំណុចកណ្តាលនៃការរញ្ជួយដីកាលពីថ្ងៃសៅរ៍គឺមានចម្ងាយប្រហែល ១២ គីឡូម៉ែត្រពីទីក្រុង Saint-Louis du Sud៕

ប្រែសម្រួល៖ Vann Vann

ប្រភព៖ BBC

ចុចអាន៖ រញ្ជួយដីនៅហៃទី អ្នកស្លាប់កើនដល់ ៣០៤នាក់ និងរបួសជិត ២,០០០នាក់