ព័ត៌មានអន្ដរជាតិ

រឿងសំខាន់៥យ៉ាងពេលអ្នកនាំពាក្យតាលីបង់ធ្វើសន្និសីទកាសែតលើកដំបូង

បានផុស

៥ years មុន

នៅ

ថ្ងៃពុធ ១៨ សីហា ២០២១

ដោយ

តាលីបង់រៀបចំធ្វើសន្និសីទសារព័ត៌មានលើកដំបូង បន្ទាប់ពីគ្រប់គ្រងអាហ្វហ្គានីស្ថានកាលពីថ្ងៃអង្គារ៍ អ្នកនាំពាក្យគឺបុរសឈ្មោះ Zabihullah Mujahid បានធ្វើឲ្យមានការភ្ញាក់ផ្អើលយ៉ាងខ្លាំង។

ក្នុងសន្នីទកាសែតរបស់តាលីបង់លើកដំបូងនេះមានរឿងគួរឲ្យចាប់អារម្មណ៍មួយចំនួន ហើយរឿងទាំងនោះហាក់ដូចជាធ្វើឲ្យពិភពលោកស្ងប់អារម្មណ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទី១៖ ភ្ញាក់ផ្អើលនឹងអ្នកនាំពាក្យតាលីបង់

ជាលើកដំបូងដែលអ្នកសារព័ត៌មានជាច្រើននាក់បានជួបមុខអ្នកនាំពាក្យនេះផ្ទាល់ ដោយសារលោក Mujahid ធ្វើការតែសំឡេង។

អ្នកកាសែត BBC អ្នកស្រី Yalda Hakim និយាយថា គាត់ភ្ញាក់ផ្អើលយ៉ាងខ្លាំងពេលឃើញជួបមុខផ្ទាល់។ គាត់បានសម្ភាសបុរសរូបនេះតាមទូរសព្ទជាង១០ឆ្នាំហើយ។

អ្នកនាំពាក្យតាលីបង់ Zabihullah Mujahid បានធ្វើឲ្យមានការភ្ញាក់ផ្អើលយ៉ាងខ្លាំង

«អត្ថបទខ្លះជាភាសាសាសនាឥស្លាម។ ពាក្យសំដីខ្លះធ្វើឲ្យយើងគិតថា បុរសនេះស្រេកឃ្លានលើអាមេរិក ស្រេកឃ្លានលើនរណាម្នាក់ក្នុងរដ្ឋាភិបាលអាហ្វហ្គានីស្ថាន។ បន្ទាប់មកថ្ងៃនេះ គាត់អង្គុយនៅទីនេះ ហើយនិយាយថា គ្មានការសងសឹក»។ អ្នកស្រី Yalda Hakim បានរៀបរាប់។

ស្ត្រីអ្នកកាសែតនេះបន្តថា ៖«នោះគឺជាអ្វីដែលជាពួកតាលីបង់។ ពួកគេបានរៀបចំ និងមានមនោគមវិជ្ជា។ គ្មានអ្វីកើតឡើងដោយចៃដន្យទេ។ សូម្បីតែបុគ្គលម្នាក់ក៏បង្កប់ភាពអាថ៌កំបាំងដែរ»។

បន្ទាប់ពីឃើញមុខអ្នកនាំពាក្យ អ្នកកាសែតជាច្រើនបានសរសេរលើបណ្តាញសង្គមរាប់ទាំងអ្នកកាសែតជើងចាស់ BBC លោក John Simpson ដែលហៅអ្នកនាំពាក្យរូបនេះថាជា«បុរសកណ្តាលនិយម និងរួសរាយរាក់ទាក់»។

ទី២៖ សិទ្ធិស្ត្រី

អ្នកនាំពាក្យតាលីបង់លោក Mujahid បានអះអាងថា សិទ្ធិស្ត្រីភេទត្រូវតែគោរពស្របតាមក្របខណ្ឌច្បាប់សាសនាឥស្លាម។ មានន័យថា ច្បាប់សាសនាឥស្លាមទូទាំងពិភពលោកគោរពសិទ្ធិស្ត្រីយ៉ាងណា ស្ត្រីអាហ្វហ្គានីស្ថានស្ថិតក្រោមការគ្រប់គ្រងរបស់តាលីបង់ក៏គោរពបែបនោះដែរ។

«យើងនឹងអនុញ្ញាតឲ្យស្រីទៅធ្វើការ និងរៀនសូត្រក្នុងក្របខណ្ឌច្បាប់របស់យើង។ ស្ត្រីនឹងដើរតួនារីសំខាន់ណាស់ក្នុងសង្គមជាតិរបស់យើង»។ អ្នកនាំពាក្យបានបញ្ជាក់។

ទី៣៖ មិនចង់មានសត្រូវ

អ្នកនាំពាក្យដែលធ្វើឲ្យអ្នកសារព័ត៌មានភ្ញាក់ផ្អើលរូបនេះបានព្យាយាមធ្វើឲ្យស្ថានភាពស្ងប់ស្ងាត និងស្រុះស្រួល។ លោកបានប្រាប់អ្នកកាសែតថា ៖«យើងមិនចង់មានសត្រូវណាម្នាក់ទាំងនៅក្នុងប្រទេស ឬក្រៅប្រទេសឡើយ»។

ទី៤៖ ការលើកលែងទោស

លោក Mujahid ក៏បានលើកឡើងថា តាលីបង់បានកំពុងធ្វើការយ៉ាងសកម្មដើម្បីបង្កើតរដ្ឋាភិបាលមួយ ហើយអាចនឹងប្រកាសនាប៉ុន្មានថ្ងៃខាងមុខ។ លោកក៏បានប៉ុនប៉ងបន្ធូរបន្ថយភាពភ័យខ្លាចក្នុងចំណោមពលរដ្ឋអាហ្វហ្គានីស្ថាន ដោយសន្យាលើកលែងទោសឲ្យអតីតសមាជិកកម្លាំងសន្តិសុខ និងអ្នកដែលបានធ្វើការជាមួយបរទេស។

ទី៥៖ មិនអនុញ្ញាតឲ្យអាហ្វហ្គានីស្ថានជាកន្លែងប្រឆាំងនរណាម្នាក់

លោកបានបញ្ជាក់ដែរថា ទឹកដីអាហ្វហ្គានីស្ថាននឹងមិនអនុញ្ញាតឲ្យប្រើប្រាស់ដើម្បីប្រឆាំងនឹងនរណាម្នាក់ទេ។ ការលើកឡើងនេះគឺឆ្លើយតបនឹងសំនួររបស់អ្នកកាសែតអំពីហានិភ័យនៃក្រុមភេរវករ អាល់កៃដា៕

ប្រែសម្រួល៖ វីរបុត្រ
ប្រភព៖ BBC