រ៉ុកកែត ១ គ្រាប់ក្នុងចំណោម ៥ គ្រាប់ហោះដល់គោលដៅព្រលានយន្តហោះក្រុងកាប៊ុល អាមេរិក ស្ទាក់ចាប់បានតែ ៤ ប៉ុណ្ណោះ

ដោយដកស្រង់ប្រភពពីតាលីបង់ ទីភ្នាក់ងារសារព័ត៌មាន Al Jazeera បានរាយការណ៍ថា រ៉ុកកែតមួយគ្រាប់ក្នុងចំណោមរ៉ុកកែតចំនួន ៥ គ្រាប់ដែលបាញ់សំដៅទៅដល់អាកាសយានដ្ឋានក្រុងកាប៊ុលនៅថ្ងៃចន្ទនេះ បានទៅដល់គោលដៅ ។

ប្រភពបានបន្ថែមថា រ៉ុកកែតត្រូវបានបាញ់ចេញពីភាគខាងជើងនៃរដ្ឋធានីអាហ្វហ្គានីស្ថាន ហើយទំហំនៃការខូចខាតនៅតែមិនទាន់ដឹងនៅឡើយទេ ទោះបីជារបាយការណ៍ដំបូងបង្ហាញថា គ្មានអ្នកស្លាប់ និងរបួសក៏ដោយ ។

មន្ត្រីអាមេរិកម្នាក់បានបញ្ជាក់ប្រាប់សារព័ត៌មាន ABC News ថា រ៉ុកកែតចំនួន ៥ គ្រាប់ ត្រូវបានបាញ់សំដៅទៅអាកាសយានដ្ឋានអន្តរជាតិ Hamid Karzai ក្នុងទីក្រុងកាប៊ុល ។

ភ្លាមៗនោះ ក្រុមមន្ត្រីបានអះអាងថា រ៉ុកកែតចំនួន ៥ គ្រាប់ ដែលត្រូវបានបាញ់ចេញពីរថយន្តមួយគ្រឿង ហោះឆ្ពោះទៅកាន់អាកាសយានដ្ឋានអន្តរជាតិទីក្រុងកាប៊ុល ត្រូវបានស្ទាក់ចាប់ដោយប្រព័ន្ធការពារមីស៊ីល C-RAM របស់អាមេរិក ។

គួរបញ្ជាក់ថា ឧបទ្ទវហេតុនេះកើតឡើងមួយថ្ងៃ បន្ទាប់ពីការវាយប្រហារដោយយន្តហោះគ្មានមនុស្សបើករបស់អាមេរិក បានរារាំងនូវអ្វីដែលក្រុមមន្រ្តីនិយាយថា ជាការវាយប្រហារមួយទៀតនៅព្រលានយន្តហោះ ៕

ប្រែសម្រួលដោយ ៖ ជីវ័ន្ត

ប្រភព ៖ UP

ចុចអាន ៖ រ៉ុកកែត ហោះសំដៅព្រលានយន្តហោះក្រុងកាប៊ុល​ ត្រូវប្រព័ន្ធការពារមីស៊ីលអាមេរិក ស្ទាក់ចាប់បាន