អ្នកបកប្រែ អាហ្វហ្គានីស្ថាន ដែលត្រៀមជម្លៀសចេញពីប្រទេស ត្រូវបាញ់សម្លាប់ដោយកាំភ្លើង AK នៅក្រុងកាប៊ុល

អ្នកបកប្រែជនជាតិអាហ្វហ្គានីស្ថានម្នាក់ដែលត្រូវបានជ្រើសរើសឲ្យជម្លៀសទៅប្រទេសហូឡង់ត្រូវបានគេសម្លាប់នៅទីក្រុងកាប៊ុល ។ នេះបើយោងតាមការផ្សាយរបស់ទូរទស្សន៍ហូឡង់ NOS ដែលបានដកស្រង់សម្តីក្រុមគ្រួសារជនរងគ្រោះ និងប្រភពពីរដ្ឋាភិបាលហូឡង់ ។

អ្នកបកប្រែរូបនេះត្រូវបានគេរាយការណ៍ថា ធ្វើការឲ្យបេសកកម្មប៉ូលិសអ៊ឺរ៉ុប (EUPOL) នៅអាហ្វហ្គានីស្ថាន ហើយប្រទេសហូឡង់ដែលជាភាគីនៃបេសកកម្មនេះ ក៏បានយល់ព្រមទទួលបុរសនោះផងដែរ ។

ក្រុមគ្រួសារជនរងគ្រោះត្រូវបានគេដកស្រង់សម្តីដោយនិយាយថា ក្រុមសកម្មប្រយុទ្ធមកពីក្រុមតាលីបង់បានទៅផ្ទះរបស់គាត់ ហើយបន្ទាប់ពីបញ្ជាក់ពីអត្តសញ្ញាណរបស់បុរសនោះ ពួកគេបានបាញ់គាត់ដោយកាំភ្លើង AK-47 ។

យោងតាមរបាយការណ៍បានឲ្យដឹងថា ដោយសារតែការភ័យខ្លាចចំពោះជីវិតរបស់គាត់ អ្នកបកប្រែរូបនេះតែងតែចំណាយពេលរាល់យប់នៅកន្លែងផ្សេងគ្នា ។

ទន្ទឹមនោះ បើទោះជាដូចការផ្សាយនេះក៏ពិតមែន តែវាពិបាកណាស់ក្នុងការបញ្ជាក់ថាតើ ក្រុមតាលីបង់ទទួលខុសត្រូវចំពោះឃាតកម្មនេះឬយ៉ាងណានោះ ។

បន្ទាប់ពីក្រុមតាលីបង់បានកាន់កាប់អាហ្វហ្គានីស្ថាន ប្រទេសជាច្រើនបានចាប់ផ្តើមជម្លៀសពលរដ្ឋ បេសកកម្មការទូត និងអ្នកស្រុកដែលបានសហការជាមួយពួកគេ ។ ជនជាតិអាហ្វហ្គានីស្ថានជាច្រើនបានព្យាយាមរត់គេចពីប្រទេសកំណើតរបស់ពួកគេ ដោយសារស្ថានការណ៍សន្តិសុខមិនច្បាស់លាស់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ បំផ្ទុះ​គ្រាប់​បែក​​អត្តឃាត​នៅ ​អាហ្វហ្គានីស្ថាន ​សម្លាប់​មនុស្ស​ ៥០ ​នាក់