លោក ពូទីន ថា ឆ្នាំក្រោយ រុស្ស៊ី នឹងមានមីស៊ីលល្បឿនលឿនជាងសំឡេង ហើយមិនបាច់ស្ទាក់ចាប់ទេ

ប្រធានាធិបតីរុស្ស៊ីលោក វ្ល៉ាឌីមៀ ពូទីន និយាយថា កងទ័ពជើងទឹករបស់ប្រទេសលោកនឹងចាប់ផ្តើមដាក់ពង្រាយមីស៊ីលល្បឿនលឿនជាងសំឡេងនៅឆ្នាំក្រោយ ។

លោក ពូទីន បានប្រកាសប្រាប់មន្ត្រីការពារជាតិកំពូលនៅទីក្រុង Sochi កាលពីថ្ងៃពុធថា ការសាកល្បងកាំជ្រួចមីស៊ីលល្បឿនលឿនជាងសំឡេង Zircon កាន់តែខិតជិតមកដល់ហើយ ។

លោក ពូទីន បាននិយាយថា នៅក្នុងការសាកល្បង កាំជ្រួចមីស៊ីលដែលបាញ់ចេញពីនាវាមុជទឹក និងកប៉ាល់លើដីបានទទួលជោគជ័យក្នុងការវាយលុកគោលដៅចំៗទាំងដែនគោក និងសមុទ្រ ។

កាលពីខែតុលា ក្រសួងការពារជាតិរុស្ស៊ីបានបញ្ចេញវីដេអូការបាញ់សាកល្បងដោយជោគជ័យ នៃមីស៊ីលល្បឿនលឿនជាងសំឡេងពីនាវាមុជទឹក ។

លោក ពូទីន បញ្ជាក់ថា មីស៊ីលនេះធ្វើដំណើរក្នុងល្បឿនលឿនជាងសំឡេងច្រើនជាង ៥ ដង ។ មីស៊ីលទាំងនេះត្រូវបានគេរាយការណ៍ថា ពិបាកស្ទាក់ចាប់ ព្រោះវាអាចផ្លាស់ប្តូរគន្លងនៅក្នុងការហោះហើរ ។

ស្របពេលជាមួយគ្នានេះ លោក ពូទីន ក៏បានសង្កត់ធ្ងន់លើសារៈសំខាន់នៃការអភិវឌ្ឍន៍ និងណែនាំបច្ចេកវិទ្យាសម្រាប់សព្វាវុធថ្មីៗ ដែលមានសមត្ថភាពទប់ទល់នឹងការគំរាមកំហែងផ្នែកយោធាពីសត្រូវបរទេស ។

គួរបញ្ជាក់ថា សហរដ្ឋ​អាមេរិក និង​ចិន​ក៏​កំពុង​អភិវឌ្ឍ​មីស៊ីលល្បឿន​លឿន​ជាង​សំឡេង​ផង​ដែរ ខណៈ​កូរ៉េ​ខាង​ជើង​បាន​អះអាង​ថា ​បានបាញ់​សាកល្បងមីស៊ីល​មួយគ្រាប់​ក្នុង​ខែ​កញ្ញា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក បៃដិន ថាឲ្យមេដឹកនាំចិន និងរុស្ស៊ីចំៗ ចំពោះការខកខាន កិច្ចប្រជុំកំពូលស្ដីពីអាកាសធាតុ