ស្អែកនេះ រុស្ស៊ីនឹងចាប់ផ្តើមចាក់វ៉ាក់សាំងការពារជំងឺកូវីដ១៩ដល់អ្នកក្រុង មូស្គូ

កាលពីថ្ងៃព្រហស្បតិ៍ម្សិលមិញនេះ អភិបាលក្រុងមូស្គូលោក Sergey Sobyanin បានប្រកាសថា ប្រជាជននៅក្នុងរដ្ឋធានីនេះនឹងអាចទទួលបានវ៉ាក់សាំង Sputnik V ចាប់ពីថ្ងៃសៅរ៍ស្អែកនេះទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វេជ្ជបណ្ឌិត គ្រូបង្រៀននិងអ្នកធ្វើការផ្នែកសង្គមនឹងជាក្រុមទីមួយដែលត្រូវគេចាក់វ៉ាក់សាំង។ យោងតាមលោក ​​Sobyanin បានឲ្យដឹងថា អ្នកក្រុងមូស្គូនឹងអាចទទួលបានការចាក់ថ្នាំបង្ការនៅតាមទីតាំងចាក់ថ្នាំដែលត្រូវបានបង្កើតឡើងជុំវិញទីក្រុង។

លោកប្រធានាធិបតី Vladimir Putin បានបញ្ជាឲ្យចាប់ផ្តើមកម្មវិធីនេះកាលពីថ្ងៃពុធដោយលោកនិយាយថា “ការផលិត Sputnik V ដែលជាវ៉ាក់សាំងត្រូវបានចុះបញ្ជីដំបូងបង្អស់លើពិភពលោកប្រឆាំងនឹងវីរុសកូរ៉ូណាគឺជាអ្វីដែលអនុញ្ញាតឲ្យយើងចាប់ផ្តើមចាក់វ៉ាក់សាំងបាន”។

ប្រទេសរុស្ស៊ីបានបង្កការភ្ញាក់ផ្អើលកាលពីខែសីហានៅពេលខ្លួនក្លាយជាប្រទេសដំបូងគេដែលបានអនុម័តរូបមន្តការពារប្រឆាំងនឹងជំងឺកូវីដ១៩។

ស្របពេលដែលអ្នកអត្ថាធិប្បាយនិងអ្នកវិទ្យាសាស្ត្រអន្តរជាតិមួយចំនួនបានសម្តែងការព្រួយបារម្ភចំពោះល្បឿនដែលរូបមន្តនេះត្រូវបានចុះបញ្ជីនោះ អ្នកបង្កើតបានអះអាងថា ការសម្រេចចិត្តគឺផ្អែកលើទិន្នន័យដំបូងនៃការសាកល្បងវិជ្ជមានដែលត្រូវបានចុះផ្សាយនៅក្នុងទស្សនាវដ្តីវេជ្ជសាស្ត្រ Lancet៕

ប្រែសម្រួលដោយ៖ Vann Vann

ប្រភព៖ RT