ប្រទេសមួយនៅ អឺរ៉ុប រកឃើញមូលហេតុដែលនាំឲ្យផ្ទុះ កូវីដ រលកទី ៤

របាយការណ៍ជាច្រើនបាននិយាយថា ការកើនឡើងនៃករណីឆ្លងជំងឺកូវីដ ១៩ នៅក្នុងប្រទេសអាល្លឺម៉ង់ ភាគច្រើនគឺបណ្ដាលមកពីមនុស្សដែលមិនបានចាក់វ៉ាក់សាំង ខណៈប្រទេសនេះកំពុងបន្តនៅក្រោមរលកថ្មីទី ៤ នៃជំងឺរាតត្បាត ។

យោងតាមរបាយការណ៍របស់កាសែត New York Times បានឲ្យដឹងថា អ្នកជំងឺកូវីដនៅប្រទេសអាល្លឺម៉ង់បានកើនឡើង ៣ ដងក្នុងរយៈពេលប៉ុន្មានសប្តាហ៍ថ្មីៗនេះ ។ ក្នុងចំណោមនោះ ជិតពាក់កណ្តាលនៃពួកគេកំពុងប្រើម៉ាស៊ីនជំនួយខ្យល់ដកដង្ហើម ហើយពួកគេម្នាក់ៗមិនបានចាក់វ៉ាក់សាំងនោះទេ ។

ប្រទេសអាល្លឺម៉ង់កាលពីថ្ងៃព្រហស្បតិ៍បានឃើញការកើនឡើងករណីឆ្លងប្រចាំថ្ងៃជាង ៥០,០០០ ករណី ពោលជាលើកដំបូងចាប់តាំងពីការចាប់ផ្តើមនៃជំងឺរាតត្បាតក្នុងឆ្នាំ ២០២០ និងស្លាប់ចំនួន ២៣៥ នាក់ដោយនាំឲ្យចំនួនអ្នកស្លាប់ឡើងដល់ ៩៧,១៩៨ នាក់ ។

សម្រាប់ប្រទេសអាឡឺម៉ង់ វាមិនធ្លាប់មានពីមុនមកទេ ដោយសារជាប្រទេសមួយក្នុងចំណោមប្រទេសមួយចំនួនដែលបានគ្រប់គ្រងវីរុសនេះ ជាមួយនឹងការធ្វើតេស្ត និងការព្យាបាលទ្រង់ទ្រាយធំ ។

ទោះបីជាយ៉ាងណាក៏ដោយ ជាមួយនឹងប្រទេសដែលកំពុងប្រយុទ្ធនឹងភាពទន់ខ្សោយខាងនយោបាយ កត្តារួមផ្សំ រួមទាំងយុទ្ធនាការចាក់វ៉ាក់សាំងយឺតយ៉ាវផងដែរនោះ បាននាំឲ្យមានការកើនឡើងនៃករណីឆ្លងប្រចាំថ្ងៃ ។

អ្វីដែលគេភ័យខ្លាចនោះគឺថា មនុស្សដែលមិនបានចាក់វ៉ាក់សាំង អាចចម្លងវីរុសនេះទៅមនុស្សចាស់ដែលមានប្រព័ន្ធការពាររាងកាយខ្សោយ ហើយនាំឲ្យអ្នកទាំងនោះចូលបន្ទប់សង្គ្រោះបន្ទាន់ (ICU) ឬស្លាប់បាន បើទោះជាចាក់វ៉ាក់សាំងក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ Hindustan Times

ចុចអាន ៖ នេះតម្លៃលេប ៥ ថ្ងៃនៃថ្នាំគ្រាប់ កូវីដ Molnupiravir