ព័ត៌មានអន្ដរជាតិ

ជប៉ុន ពិចារណាបញ្ចេញប្រេងបម្រុងរបស់ខ្លួន ជួយកាត់បន្ថយតម្លៃលក់លើលោក

បានផុស

៥ years មុន

នៅ

ថ្ងៃសៅរ៍ ២០ វិច្ឆិកា ២០២១

ដោយ

ទីភ្នាក់ងារសារព័ត៌មាន Kyodo បានរាយការណ៍ថា រដ្ឋាភិបាលជប៉ុន កំពុងពិចារណាបញ្ចេញប្រេងពីទុនបម្រុងរបស់ខ្លួន ជាការឆ្លើយតបទៅនឹងការកើនឡើង តម្លៃប្រេងឆៅលើលើលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាលើកទីមួយហើយ សម្រាប់ជប៉ុនដែលបញ្ចេញទុនបម្រុងប្រេង សម្រាប់ជាប្រយោជន៍ដល់ការបញ្ចុះតម្លៃ បើទោះបីជាប្រទេសនេះកាលពីអតីតកាល បានទាញយកទុនបម្រុងបែបនេះ នៅពេលដែលខ្លួនប្រឈមនឹងគ្រោះមហន្តរាយធម្មជាតិ និងហានិភ័យភូមិសាស្ត្រនយោបាយ នៅក្រៅប្រទេសក៏ដោយ។

ដោយឡែក រដ្ឋាភិបាលរបស់ប្រធានាធិបតីអាមេរិក Joe Biden ដែលប្រឈមមុខនឹងការធ្លាក់ចុះការវាយតម្លៃ និងតម្លៃប្រេងសាំងខ្ពស់ បានជំរុញប្រទេសដែលមានសេដ្ឋកិច្ចធំជាងគេមួយចំនួន ក្នុងពិភពលោក ឲ្យពិចារណាបញ្ចេញប្រេងពីទុនបម្រុងយុទ្ធសាស្ត្ររបស់ពួកគេ ដើម្បីទប់ស្កាត់តម្លៃថាមពលខ្ពស់។

សំណើទាំងនោះ រួមមានការស្នើសុំចិនជាលើកដំបូង ដើម្បីពិចារណាការបញ្ចេញស្តុកប្រេងឆៅ។

ប្រទេសជប៉ុនបានប្រតិកម្មជាវិជ្ជមាន ចំពោះការផ្សព្វផ្សាយដំបូងរបស់សហរដ្ឋអាមេរិក លើការដោះលែងទុនបម្រុងដែលអាចធ្វើទៅបាន ហើយកំពុងពិចារណាពីជំហានបែបនេះ។

ប្រធានខុទ្ទកាល័យ លោក Hirokazu Matsuno បានបដិសេធ មិនធ្វើអត្ថាធិប្បាយអំពីសំណើររបស់សហរដ្ឋអាមេរិក ដែលត្រូវបានរាយការណ៍ដំបូងដោយ សារព័ត៌មាន Reuters ។

លោកបានប្រាប់អ្នកយកព័ត៌មានថា “យើងនឹងបន្តឃ្លាំមើលយ៉ាងដិតដល់ ពីរបៀបដែលការកើនឡើងតម្លៃប្រេងឆៅ នឹងប៉ះពាល់ដល់ទីផ្សារថាមពលពិភពលោក និងសេដ្ឋកិច្ចជប៉ុន” ។ “ខណៈពេលដែលជំរុញឲ្យប្រទេសផលិតប្រេង បង្កើនទិន្នផលប្រេង យើងនឹងខិតខំធ្វើឲ្យទីផ្សារថាមពលមានស្ថិរភាព ដោយការសម្របសម្រួលជាមួយប្រទេសអ្នកប្រើប្រាស់ធំៗ និងអង្គការអន្តរជាតិ” ដូចជាទីភ្នាក់ងារថាមពលអន្តរជាតិជាដើម។

គួរបញ្ចាក់ថា ប្រទេសជប៉ុនដែលក្រីក្រធនធាន ទទួលបានប្រេងភាគច្រើនរបស់ខ្លួនពីមជ្ឈិមបូព៌ា។ ការឡើងថ្លៃប្រេងនាពេលថ្មីៗនេះ និងការធ្លាក់ចុះនៃប្រាក់យ៉េន កំពុងជំរុញឲ្យតម្លៃនៃការនាំចូលកើនឡើង ដោយធ្វើមានការឲ្យប៉ះទង្គិចទ្វេរដងដល់ប្រទេសដែលពឹងផ្អែកលើពាណិជ្ជកម្ម។

រដ្ឋាភិបាលរបស់នាយករដ្ឋមន្រ្តី Fumio Kishida កាលពីថ្ងៃសុក្រ បានបង្ហាញផែនការជំរុញសេដ្ឋកិច្ចចំនួន ៤៩០ ពាន់លានដុល្លារ រួមទាំងវិធានការដើម្បីទប់ទល់នឹងតម្លៃប្រេងឡើងថ្លៃ។ ខ្លួនគ្រោងនឹងឧបត្ថម្ភធនដល់ក្រុមហ៊ុនចម្រាញ់ប្រេង ក្នុងក្តីសង្ឃឹមនៃការកំណត់តម្លៃប្រេងសាំងលក់ដុំ និងប្រេងឥន្ធនៈ ដើម្បីបន្ធូរបន្ថយដល់គ្រួសារក្រីក្រ និងក្រុមហ៊ុន ពីការកើនឡើងថ្លៃប្រេង៕

ប្រែសម្រួល៖ សាង ស្រីល័ក្ខ

ប្រភព៖reuters

ចុចអាន៖ថ្ងៃពុធនេះ តម្លៃប្រេងអន្តរជាតិបន្តធ្លាក់ចុះ

ចុចអាន៖អតីតព្រះនាង Mako និងស្វាមី ចាកចេញពី ជប៉ុន ទៅរស់នៅ អាមេរិក ក្នុងនាមជារាស្ត្រសាមញ្ញ