ថៃ ធ្វើតេស្តរក Omicron លើអ្នកដំណើរមកពីអាហ្វ្រិកខាងត្បូង ជាង១ពាន់នាក់ ពេលនេះចេញលទ្ធផលហើយ

នាយកដ្ឋានគ្រប់គ្រងជំងឺថៃ (DDC) បានអះអាងកាលពីម្សិលមិញថា​ អ្នកដំណើរមកពីអាហ្វ្រិកខាងត្បូងទាំង ១,០០៧ នាក់ ដែលទើបតែមកដល់ប្រទេសថៃ បានធ្វើតេស្តអវិជ្ជមានជំងឺកូវីដ១៩។

លោកវេជ្ជបណ្ឌិត Opas Karnkawinpong អគ្គនាយក DDC បាននិយាយថា អ្នកទាំងអស់កំពុងធ្វើចត្តាឡីស័កក្រោមកម្មវិធី Sandbox ទេសចរណ៍របស់ប្រទេសថៃ ដែលមានន័យថា ពួកគេកំពុងត្រូវបានត្រួតពិនិត្យយ៉ាងដិតដល់ដោយអាជ្ញាធរសុខាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីរុសបំប្លែងខ្លួនប្រភេទថ្មីឈ្មោះ Omicron ដែលមានសក្តានុពលឆ្លងកាន់តែសាហាវ បានលេចចេញដំបូងនៅក្នុងប្រទេសអាហ្វ្រិកខាងត្បូង ហើយចាប់តាំងពីពេលនោះមក ត្រូវបានរកឃើញនៅក្នុងប្រទេសអូស្ត្រាលី ចក្រភពអង់គ្លេស អាល្លឺម៉ង់ អ៊ីស្រាអែល អ៊ីតាលី និងហុងកុង។

អ្នកនាំពាក្យរដ្ឋាភិបាល លោកស្រី Rachada Dhnadirek បាននិយាយថា នាយកដ្ឋានវិទ្យាសាស្ត្រវេជ្ជសាស្ត្រ មិនបានរកឃើញវីរុសបំប្លែងថ្មីនេះ សូម្បីតែមួយករណីនៅក្នុងប្រទេសថៃ។

ឥឡូវនេះ នាយកដ្ឋានកំពុងស្នើសុំឲ្យមន្ទីរពេទ្យឯកជនទាំងអស់ បញ្ជូនសំណាកអ្នកជំងឺទាំងអស់ដែលធ្វើតេស្តវិជ្ជមានកូវីដ១៩ ដើម្បីធ្វើតេស្តហ្សែនរកវីរុសបំប្លែងខ្លួនរបស់បុគ្គលនីមួយៗ និងអត្រាប្រេវ៉ាឡង់របស់វា។

ទោះបីជាយ៉ាងណាក៏ដោយ ប្រទេសថៃ បានជំរុញឲ្យសាធារណជនរក្សាភាពស្ងប់ស្ងាត់ និងរង់ចាំរហូតដល់មានព័ត៌មានច្បាស់លាស់៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ហូឡង់ រកឃើញវីរុសបំប្លែងថ្មី Omicron លើអ្នកដំណើរ ១៣នាក់មកពី អាហ្វ្រិកខាងត្បូង