អ្នកវិទ្យាសាស្រ្តបញ្ជាក់ហើយ វ៉ាក់សាំង៣ដូស ទើបអាចយកឈ្នះ Omicron បាន

ក្រុមអ្នកវិទ្យាសាស្ត្រអង់គ្លេសបានព្រមានថា ការចាក់វ៉ាក់សាំងកូវីដពីរដូស គឺមិនគ្រប់គ្រាន់ដើម្បីបញ្ឈប់អ្នកពីការឆ្លងវីរុសបំប្លែងខ្លួន Omicron នោះទេ។

ការវិភាគដំបូងនៃករណី Omicron និង Delta របស់ចក្រភពអង់គ្លេសបានបង្ហាញថា ថ្នាំបង្ការមិនសូវមានប្រសិទ្ធភាពក្នុងការបញ្ឈប់វីរុសបំប្លែងខ្លួនថ្មីឡើយ។

ប៉ុន្តែ វ៉ាក់សាំងដូសទីបី អាចរារាំងមនុស្សប្រហែល៧៥% ពីការចេញរោគសញ្ញាកូវីដ។

កង្វល់ចម្បងមួយចាប់តាំងពីវីរុសបំប្លែងខ្លួន Omicron លេចឡើងជាលើកដំបូងគឺថា វានឹងធ្វើឲ្យវ៉ាក់សាំងកាន់តែមានប្រសិទ្ធភាពតិច។

របាយការណ៍របស់ទីភ្នាក់ងារសន្តិសុខសុខភាពចក្រភពអង់គ្លេស បានវិភាគទិន្នន័យពីករណី Omicron ចំនួន៥៨១ និង Delta រាប់ពាន់ករណី ដើម្បីគណនាថាតើ វ៉ាក់សាំងមានប្រសិទ្ធភាពកម្រិតណាប្រឆាំងនឹងវីរុសបំប្លែងខ្លួនថ្មី។

ការវិភាគគឺផ្អែកលើទិន្នន័យមានកំណត់ ប៉ុន្តែបានបង្ហាញពីការថយចុះយ៉ាងខ្លាំងនៃប្រសិទ្ធភាពរបស់វ៉ាក់សាំង Oxford-AstraZeneca និងការធ្លាក់ចុះយ៉ាងសំខាន់នៃវ៉ាក់សាំង Pfizer ចំនួនពីរដូស។

ទោះបីជាយ៉ាងណាក៏ដោយ មិនមានទិន្នន័យគ្រប់គ្រាន់ដើម្បីវិភាគលើវ៉ាក់សាំង Moderna ឬ Janssen ទេ ប៉ុន្តែគ្មានហេតុផលណាដែលគិតថាពួកគេនឹងផ្តល់លទ្ធផលខុសគ្នាឡើយ៕

ប្រែសម្រួល៖ Vann Vann

ប្រភព៖ BBC

ចុចអាន៖ វ៉ាក់សាំង Sputnik V កាត់បន្ថយ អត្រាមរណភាពមនុស្សវ័យចំណាស់ ដល់ទៅ៩៦,៦%