ថៃ កែរូបមន្តវ៉ាក់សាំងកូវីដផលិតពីថ្នាំជក់ដំបូងបំផុតរបស់ខ្លួនប្រឆាំង Omicron

លោកវេជ្ជបណ្ឌិត Waranyu Pooncharoen សហស្ថាបនិក និងជាប្រធានផ្នែកបច្ចេកវិទ្យានៃក្រុមហ៊ុន Baiya Phytopharm បាននិយាយថា វ៉ាក់សាំងកូវីដផលិតក្នុងស្រុកឈ្មោះ Baiya ដែលបច្ចុប្បន្នកំពុងដំណើរការសាកល្បងលើមនុស្ស អាចត្រូវបានកែសម្រួលរូបមន្តដើម្បីប្រឆាំងនឹងវីរុសបំប្លែងខ្លួន Omicron ។

វ៉ាក់សាំង Baiya ផលិតឡើងពីថ្នាំជក់មានកម្រិតជាតិនីកូទីនទាប ដែលយកមកដោយផ្ទាល់ពីប្រទេសអូស្រ្តាលី ។ ស្លឹករបស់វាត្រូវបានគេប្រើធ្វើជាមុខងារសំខាន់ក្នុងការបង្កើតប្រូតេអ៊ីន ហើយប្រូតេអ៊ីននោះក៏នឹងត្រូវបានយកចេញពីស្លឹករបស់ថ្នាំជក់ ដើម្បីទៅ ផលិតជាវ៉ាក់សាំងបង្ការជំងឺកូវីដ ១៩ សម្រាប់បង្កើតអង់ទីករការពារខ្លួនដល់អ្នកប្រើប្រាស់ ។

លោក Waranyu បាននិយាយថា “អ្នកស្រាវជ្រាវរបស់យើងកំពុងធ្វើតេស្តប្រសិទ្ធភាពនៃវ៉ាក់សាំងចំពោះសត្វដែលឆ្លងវីរុសបំប្លែងខ្លួន Omicron ហើយនឹងកែសម្រួលរូបមន្តប្រូតេអ៊ីននៃវ៉ាក់សាំងដើម្បីធ្វើឲ្យវាកាន់តែឆ្លើយតបទៅ នឹងវីរុសថ្មីនេះ” ។

លោក​បញ្ជាក់​ថា “​ដំណើរ​ការ​នេះ​នឹង​មិន​ប្រើ​ពេល​យូរ​ទេ​ ព្រោះ​តែ​ផ្នែក​នៃ​ហ្សែន​ថ្នាំជក់​ត្រូវ​ការ​កែច្នៃ​ ខណៈ​ដែល​ដំណើរការ​ផលិត​នឹង​នៅ​ តែ​ដដែល​ ។ លោកបញ្ជាក់ថា “ការវិវត្តរបស់មេរោគមិនតែងតែមានន័យថា វ៉ាក់សាំងដែលមានស្រាប់នឹងមិនមានប្រសិទ្ធភាពនោះទេ” ។

គួរបញ្ជាក់ថា ក្រុមហ៊ុននេះនឹងដាក់ដំណើរការប្រើប្រាស់វ៉ាក់សាំងនៅ ចុងឆ្នាំក្រោយក្នុងរោងចក្រផលិតវ៉ាក់សាំងដំបូងគេនៅ អាស៊ីដែលមានទីតាំងនៅ សាកលវិទ្យាល័យ Chulalongkorn ។ រោងចក្រនេះអាចផលិតវ៉ាក់សាំងបានរហូតដល់ ៥ លានដូសក្នុងមួយខែ ឬរហូតដល់ ៦០ លានដូសក្នុងមួយឆ្នាំ ៕

ប្រែសម្រួលដោយ ៖ ជីវ័ន្ត

ប្រភព ៖ Thaiger

ចុចអាន ៖ ថៃ រកឃើញអ្នកឆ្លង Omicron ថែមទៀតហើយ