ផ្លូវក្រោមទឹកល្បឿនលឿនវែងបំផុតរបស់ចិន បើកដំណើរការហើយ

បន្ទាប់ពីការសាងសង់អស់រយៈពេលជិត៤ឆ្នាំ ផ្លូវក្រោមទឹកល្បឿនលឿនវែងបំផុតរបស់ប្រទេសចិន ឥឡូវនេះត្រូវបានបើកឲ្យធ្វើចរាចរណ៍ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយប្រវែង១០.៧៩គីឡូម៉ែត្រ, ផ្លូវក្រោមទឹក Taihu គឺលាតសន្ធឹងក្រោមបឹង Taihu ក្នុងខេត្ត Jiangsu ភាគខាងកើតប្រទេសចិន។

យោងតាមមន្ត្រីរដ្ឋាភិបាលក្នុងខេត្ត Jiangsu បានឲ្យដឹងថា ផ្លូវក្រោមទឹកនេះ ត្រូវបានសាងសង់អស់ទឹកប្រាក់ ៩.៩ពាន់លានយ័ន (ប្រហែល ១.៥៦ពាន់លានដុល្លារ) ខណៈការសាងសង់ចាប់​ផ្តើម​នៅ​ថ្ងៃ​ទី​៩ ខែ​មករាឆ្នាំ​២០១៨។

ទីភ្នាក់ងារព័ត៌មានចិន Xinhua បានចុះផ្សាយថា បេតុងជាង ២លានម៉ែត្រគូប ត្រូវបានប្រើប្រាស់សម្រាប់សាងសង់ផ្លូវក្រោមទឹក ដែលមានទទឹង ១៧.៤៥ម៉ែត្រមួយនេះ។

ផ្នែកខាងលើនៃផ្លូវក្រោមទឹកនេះ ត្រូវបានបំពាក់ដោយភ្លើង LED ចម្រុះពណ៌ ដែលរចនាឡើងដើម្បីការពារមិនឲ្យ អ្នកបើកបរអស់កម្លាំង។

ផ្លូវក្រោមទឹកនេះគឺជាផ្នែកមួយនៃផ្លូវហាយវ៉េ Changzhou-Wuxi ប្រវែង៤៣.៩គីឡូម៉ែត្រ ដែលបើកដំណើរការជាសាធារណៈកាលពីថ្ងៃទី៣០ខែធ្នូឆ្នាំ២០២១។

ដោយតភ្ជាប់ផ្លូវល្បឿនលឿនរបស់ Suzhou, Wuxi និង Changzhou, ផ្លូវនេះត្រូវបានសាងសង់ឡើងដើម្បីកាត់បន្ថយសម្ពាធចរាចរណ៍លើទីក្រុងនានា នៅជាប់បឹង Taihu ហើយវាក៏ជំរុញការអភិវឌ្ឍន៍សេដ្ឋកិច្ចនៃបណ្តាទីក្រុង នៅក្នុងតំបន់ដីសណ្ដទន្លេ Yangtze៕

ប្រែសម្រួល៖ Vann Vann

ប្រភព៖ CNN

ចុចអាន៖ ចិន សាងសង់ស្ពានឆ្លងកាត់បឹងប្រវែង ១៣៥ គីឡូម៉ែត្រពន្លឿនការចល័ត ទ័ពទៅដល់ ឥណ្ឌា