ព័ត៌មានអន្ដរជាតិ

FDA បញ្ចេញលទ្ធផលសុវត្ថិភាពនៃវ៉ាក់សាំងកូវីដ របស់ក្រុមហ៊ុន Pfizer/BioNTech

បានផុស

៥ years មុន

នៅ

ថ្ងៃពុធ ៩ ធ្នូ ២០២០

ដោយ

ទីភ្នាក់ងារសហព័ន្ធសហរដ្ឋអាមេរិកនិយាយថា ខ្លួនមិនបានរកឃើញនូវហានិភ័យអំពីសុវត្ថិភាពជាក់លាក់ណាមួយនោះទេ ហើយបានទទួលស្គាល់លទ្ធផលក្នុងការពិនិត្យនៃការសាកល្បងព្យាបាលសម្រាប់វ៉ាក់សាំងប្រឆាំងជំងឺកូវីដ ១៩ របស់ក្រុមហ៊ុនឱសថយក្សអាមេរិក Pfizer និងសហដៃគូអាល្លឺម៉ង់ BioNTech ។

រដ្ឋបាលចំណីអាហារ និងឪសថអាមេរិក (FDA) បានចេញលទ្ធផលលម្អិតនៃការសាកល្បងព្យាបាលនេះកាលពីថ្ងៃអង្គារ ។ ទីភ្នាក់ងារនេះនិយាយនៅក្នុងឯកសារមួយថា លទ្ធផលមិនបានលើកឡើងពីកង្វល់សុវត្ថិភាពដែលនឹងរារាំងការចេញលិខិតអនុញ្ញាតឲ្យប្រើប្រាស់នោះទេ ។ របាយការណ៍នោះបង្ហាញពីទិន្នន័យសុវត្ថិភាព និងប្រសិទ្ធភាពសម្រាប់អ្នកចូលរួមប្រហែល ៤០,០០០ នាក់នៅក្នុងការសាកល្បងព្យាបាល ។

FDA និយាយថា វ៉ាក់សាំងនេះមានប្រសិទ្ធភាពក្នុងការការពារជំងឺកូវីដ ១៩ ពីការកើតឡើងយ៉ាងហោចណាស់ ៧ ថ្ងៃ បន្ទាប់ពីការចាក់លើកទី ២ ចំនួន ៩៥ ភាគរយនៅគ្រប់ក្រុមអាយុទាំងអស់ ។

ទាក់ទងនឹងប្រតិកម្មមិនល្អវិញ ៨៤.១ ភាគរយនៃអ្នកចូលរួមមានប្រតិកម្មនៅកន្លែងចាក់ថ្នាំភ្លាមៗ ។ ការអស់កម្លាំងត្រូវបានគេរាយការណ៍ថាមានចំនួន ៦២.៩ ភាគរយនៃអ្នកចូលរួម ឈឺក្បាលក្នុង ៥៥.១ ភាគរយ ឈឺសាច់ដុំក្នុង ៣៨.៣ ភាគរយ រងារញាក់ក្នុង ៣១.៩ ភាគរយ ឈឺសន្លាក់ក្នុង ២៣.៦ និងគ្រុនក្ដៅក្នុង ១៤.២ ។ ប៉ុន្តែប្រតិកម្មភាគច្រើនគឺស្រាលទៅមធ្យមប៉ុណ្ណោះ ។

ស្របពេលជាមួយគ្នានេះ FDA នឹងកោះប្រជុំគណៈកម្មាធិការប្រឹក្សាមួយនៅថ្ងៃព្រហស្បតិ៍នេះដើម្បីស្តាប់យោបល់របស់អ្នកជំនាញមុនពេលសម្រេចចិត្តថាតើត្រូវផ្តល់ការយល់ព្រមសម្រាប់ការប្រើប្រាស់វ៉ាក់សាំងនេះឬយ៉ាងណា ៕