តុងហ្គា មានតែបណ្ដាញ 2G ប្រើប៉ុណ្ណោះ ក្រោយជួបរលកយក្សស៊ូណាមិ

ក្រសួងការបរទេស និងពាណិជ្ជកម្មរបស់ប្រទេសនូវែលសេឡង់បានប្រកាសកាលពីថ្ងៃពុធថា ប្រព័ន្ធទូរគមនាគមន៍បណ្តោះអាសន្នមួយត្រូវបានបង្កើតឡើងនៅក្នុងប្រទេសតុងហ្គា ដែលអនុញ្ញាតឲ្យតំបន់ដែលរងគ្រោះដោយរលកយក្សស៊ូណាមិអាចតភ្ជាប់ជាមួយពិភពខាងក្រៅដោយប្រើបណ្តាញ 2G ។

ទោះជាយ៉ាងណាក៏ដោយ ការតភ្ជាប់បណ្ដាញ 2G នេះបង្កើតឡើងដោយ Digicel ដែលជាក្រុមហ៊ុនផ្តល់បណ្តាញទូរស័ព្ទចល័តអន្តរជាតិនឹងមានកម្រិត និងមានភាពយឺតយ៉ាវ ដែលគ្របដណ្តប់ប្រហែល ១០ ភាគរយប៉ុណ្ណោះនៃសមត្ថភាពធម្មតា ដោយផ្តល់អាទិភាពដល់ការទំនាក់ទំនងតែជាសំឡេង និងសារ SMS ។

ចំណែកក្រុមហ៊ុនខ្សែកាបអាមេរិក SubCom បាននិយាយថា យ៉ាងហោចណាស់ ៤ សប្តាហ៍គឺចាំបាច់ដើម្បីជួសជុលការតភ្ជាប់ខ្សែកាបរបស់តុងហ្គា ។

រហូតមកដល់ពេលនេះ ថាមពលនៅក្នុងប្រទេសប្រជុំកោះប៉ាស៊ីហ្វិកមួយនេះត្រូវបានស្ដារឡើងវិញមួយចំនួនហើយ ខណៈការសម្អាត និងវាយតម្លៃការខូចខាតកំពុងបន្ត ។

ជាងនេះទៅទៀត ជើងហោះហើរមនុស្សធម៌ដំបូងក៏កំពុងធ្វើដំណើរទៅកាន់តុងហ្គាផងដែរ ពោល ៥ ថ្ងៃ បន្ទាប់ពីគ្រោះមហន្តរាយចំនួន ២ បានកាត់ផ្តាច់ប្រទេសប៉ាស៊ីហ្វិកចេញពីពិភពលោកទាំងមូល ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ បណ្តុំរូបភាពសោកសង្រេង ក្រោយគ្រោះមហន្តរាយនៅ តុងហ្គា