យន្តហោះចម្បាំងអាមេរិក ជួបឧប្បត្តិហេតុក្នុង សមុទ្រចិនខាងត្បូង

កងទ័ពជើងទឹកអាមេរិកចំនួន៧នាក់បានរងរបួសកាលពីថ្ងៃចន្ទទី២៤ខែមករា នៅពេលយន្តហោះចម្បាំង F-35C ជួបឧប្បត្តិហេតុចុះចត នៅលើនាវាផ្ទុកយន្តហោះ USS Carl Vinson ក្នុងសមុទ្រចិនខាងត្បូង។

សេចក្តីថ្លែងការណ៍របស់កងទ័ពជើងទឹកបាននិយាយថា ឧបទ្ទវហេតុនេះកើតឡើងក្នុងអំឡុង ប្រតិបត្តិការហោះហើរជាប្រចាំ នៅក្នុងសមុទ្រចិនខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាកាសយានិក បានរំដោះខ្លួនចេញពីយន្តហោះដោយសុវត្ថិភាព ហើយត្រូវបានជួយសង្គ្រោះដោយឧទ្ធម្ភាគចក្រយោធាអាមេរិក។ មានកងទ័ពជើងទឹកសរុប៧នាក់បានរងរបួស។

ក្នុងនោះ មានកងទ័ពជើងទឹក៣នាក់ត្រូវតម្រូវឲ្យមានការជម្លៀសទៅព្យាបាលក្នុងទីក្រុងម៉ានីលនៃប្រទេសហ្វីលីពីន ហើយ៤នាក់ត្រូវបានព្យាបាលនៅលើនាវា។ ទោះបីជាយ៉ាងណាក៏ដោយ គ្មាននរណាម្នាក់រងរបួសធ្ងន់ទេក្នុងហេតុការណ៍នេះ។

កងទ័ពជើងទឹកបាននិយាយថា មូលហេតុនៃឧប្បត្តិហេតុយន្តហោះផលិតដោយក្រុមហ៊ុន Lockheed Martin មួយនេះ កំពុងស្ថិតក្រោមការស៊ើបអង្កេត។

គួរបញ្ជាក់ថា បើយោងតាមមន្ទីរបញ្ចកោណ, កងនាវាផ្ទុកយន្តហោះចម្បាំងអាមេរិកពីរក្រុម ដែលដឹកនាំដោយនាវា Carl Vinson និង USS Abraham Lincoln បានចាប់ផ្តើមប្រតិបត្តិការនៅសមុទ្រចិនខាងត្បូងកាលពីថ្ងៃអាទិត្យទី២៣ខែមករាមក៕

ប្រែសម្រួល៖ Vann Vann

ប្រភព៖ CNA

ចុចអាន៖ អាមេរិក បង្កើនប្រតិបត្តិការនៅ សមុទ្រចិនខាងត្បូង