ប្រមុខ​ណាតូ​បារម្ភ​វិបត្តិ​ថាមពល​នៅ​អឺរ៉ុប ដោយ​សារ​រុស្ស៊ី​ជា​អ្នកផ្គត់​ផ្គង់​ធំ​

ប្រមុខដឹកនាំសម្ព័ន្ធភាព​អង្គការណាតូបាននិយាយកាលពីថ្ងៃអាទិត្យថា អឺរ៉ុបត្រូវធ្វើពិពិធកម្មចំពោះការផ្គត់ផ្គង់ថាមពល​របស់ខ្លួន ដោយសារប្រទេសរុស្ស៊ីជាអ្នកផ្គត់ផ្គង់ឧស្ម័នធំបំផុតក្នុងទ្វីបនេះ។

រុស្ស៊ីបានដាក់ពង្រាយកម្លាំងទ័ពជាង១០ម៉ឺននាក់នៅព្រំដែនជិតអ៊ុយក្រែនដើម្បីទាមទារឲ្យសម្ព័ន្ធភាពលោកខាងលិចដកកម្លាំងទ័ព និងគ្រឿងសព្វាវុធចេញពីអឺរ៉ុបខាងកើត និងរារាំងអ៊ុយក្រែនចូលជាសមាជិកអង្គការណាតូ។

មន្ត្រីអាមេរិកនិយាយថា ការបង្កើនសមត្ថភាព​របស់រុស្ស៊ីទាំងកម្លាំងទ័ព គ្រឿងសព្វាវុធ និងបរិក្ខាពេទ្យអាចជាការត្រៀមខ្លួនសម្រាប់សង្គ្រាមនៅព្រំដែនអ៊ុយក្រែន។ ទោះបីជាយ៉ាងណា រុស្ស៊ីបានបដិសេធពីផែនការវាយប្រហារណាមួយ។

សហភាពអឺរ៉ុបពឹងផ្អែកលើរុស្ស៊ីប្រហែលជាមួយភាគបីនៃការផ្គត់ផ្គង់ឧស្ម័នរបស់ខ្លួន ហើយប្រសិនបើមានការផ្ទុះអាវុធណាមួយកើតឡើងនោះអាចធ្វើឲ្យអឺរ៉ុបជួបវិបត្តិកង្វះថាមពល។

អគ្គលេខាធិការអង្គការណាតូ លោក Jens Stoltenberg បាននិយាយថា ៖«យើងព្រួយបារម្ភពីស្ថានភាពថាមពលនៅអឺរ៉ុប ពីព្រោះវាបង្ហាញពីភាពងាយរងគ្រោះនៃការពឹងផ្អែកលើអ្នកផ្គត់ផ្គង់ឧស្ម័នតែមួយ និងថា នោះជាហេតុផលដែល សម្ព័ន្ធភាពណាតូ ឯកភាពគ្នាថា យើងត្រូវធ្វើការ និងផ្តោតលើការធ្វើពិពិធកម្មការផ្គត់ផ្គង់»៕

ប្រែសម្រួល៖ វីរបុត្រ
ប្រភព៖ reuters