“កូវីដ ២២” ជាឈ្មោះថ្មីរបស់វីរុសផ្លូវដង្ហើម NeoCoV បើឆ្លងដល់មនុស្ស (មានវីដេអូ)

អនុប្រធានគណៈកម្មការសុខភាពសាធារណៈថៃលោក Chalermchai Boonyaleephan បាននិយាយកាលពីថ្ងៃអង្គារថា ក្រុមអ្នកស្រាវជ្រាវចិននៅទីក្រុងអ៊ូហានបានដាក់ការប្រុងប្រយ័ត្នលើប្រភេទសត្វប្រចៀវដែលគេស្គាល់ថាជាវីរុសកូរ៉ូណាថ្មី និងអាចមានសក្តានុពលឆ្លងខ្លាំងជាងវីរុសកូវីដ ១៩ ចំនួន ៣ ដង ។

លោក Chalermchai បាននិយាយថា “ប្រសិនបើវីរុសមានការបម្រែបម្រួល និងឆ្លងទៅកាន់មនុស្ស វាអាចប្រែទៅជា “ជំងឺកូវីដ ២២” ហើយនៅទីបំផុតវាអាចគ្រប់គ្រងលើវីរុសផ្លូវដង្ហើម “MERS-CoV-2” ហើយវាអាចមានរោគសញ្ញាធ្ងន់ធ្ងរជាងកូវីដ ១៩ ដល់ទៅ ៣ ដង ជាមួយនឹងអត្រាមរណភាពខ្ពស់ជាង ៣០ ភាគរយ ។

បច្ចុប្បន្នវាត្រូវបានគេដាក់ឈ្មោះថា “NeoCoV” ហើយវាត្រូវបានគេកំណត់អត្តសញ្ញាណដំបូងក្នុងឆ្នាំ ២០១១ ប៉ុន្តែមិនត្រូវបានគេដឹងថាឆ្លងដល់មនុស្សនោះទេ ។

អ្នកវិទ្យាសាស្ត្របាននិយាយថា មេរោគនេះគឺស្រដៀងនឹងជំងឺ MERS ឬរោគសញ្ញាផ្លូវដង្ហើមមជ្ឈិមបូព៌ាឆ្នាំ ២០១២  ដែលបានបង្ហាញខ្លួនជាលើកដំបូងនៅក្នុងប្រទេសអារ៉ាប៊ីសាអូឌីត ហើយជំងឺ MERS មានអត្រាមរណភាពប្រហែល ៣៤ ភាគរយ ។

ចំណែកអង្គការសុខភាពពិភពលោក (WHO) បាននិយាយកាលពីថ្ងៃសុក្រសប្តាហ៍មុនថា NeoCoV ចាំបាច់ត្រូវសិក្សាបន្ថែមទៀតភ្លាមៗដើម្បីឲ្យដឹងច្បាស់លាស់ថា តើវានឹងឆ្លងដល់មនុស្សនាពេលអនាគតដែរឬទេ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Thaiger

ចុចអាន ៖ វីរុសកូវីដបំប្លែងខ្លួនថ្មី លេចចេញមកទៀតហើយ អាចបង្កការគំរាមកំហែង ដល់មនុស្សពេលអនាគត (មានវីដេអូ)