បេសកជន រុស្ស៊ី ប្រចាំ UN ថា ដល់ពេលដែល អាមេរិក ដកអាវុធនុយក្លេអ៊ែរ ពីអឺរ៉ុបហើយ (មានវីដេអូ)

តំណាងអចិន្ត្រៃយ៍រុស្ស៊ីប្រចាំអង្គការសហប្រជាជាតិ (UN) នៅទីក្រុងហ្សឺណែវលោក Gennady Gatilov បាននិយាយកាលពីថ្ងៃអង្គារថា “ដល់ពេលដែលអាមេរិកត្រូវដកអាវុធនុយក្លេអ៊ែរចេញពីអឺរ៉ុបខាងលិច និងខាងកើតហើយ” ។

លោក Gatilov បានប្រាប់ទូរទស្សន៍លីបង់ Al-Mayadeen ថា “មូលដ្ឋានទ័ពអាមេរិកបង្កការគំរាមកំហែងដល់សន្តិសុខរបស់រុស្ស៊ី ហើយទីក្រុងមូស្គូបានទាមទារជាយូរមកហើយឲ្យក្រុងវ៉ាស៊ីនតោនដកអាវុធទាំងនេះចេញពីព្រំដែនរុស្ស៊ី” ។

លើសពីនេះអ្នកការទូតរុស្ស៊ីបានចង្អុលបង្ហាញថា សហរដ្ឋអាមេរិកនឹងមិនអាចដករុស្ស៊ីចេញពីក្រុមប្រឹក្សាសិទ្ធិមនុស្សអង្គការសហប្រជាជាតិ ឬក្រុមប្រឹក្សាសន្តិសុខអង្គការសហប្រជាជាតិបានទេ ។ លោក​ក៏​បាន​បញ្ជាក់​ផង​ដែរ​ថា ទីក្រុង​មូស្គូ​មិន​មាន​ជំនឿ​ថា​ កិច្ច​សន្ទនា​​នឹង​នាំ​មក​នូវ​លទ្ធផល​ដែល​ចង់​បាន​រវាង​មន្ត្រី​អ៊ុយក្រែន និង​រុស្ស៊ីនោះទេ ។

លោក Gatilov បានប្រាប់ទូរទស្សន៍លីបង់ Al-Mayadeen ថា “ទំនាក់ទំនងបានចាប់ផ្តើមរវាងគណៈប្រតិភូអ៊ុយក្រែន និងរុស្ស៊ី ហើយយើងសង្ឃឹមថា ទំនាក់ទំនងទាំងនេះនឹងបន្តនាពេលអនាគតដ៏ខ្លីបំផុត ហើយនឹងបម្រើជាការចាប់ផ្តើមនៃដំណោះស្រាយនយោបាយ” ។

លោក Gatilov បន្ថែមថា “យើងគាំទ្រមធ្យោបាយការទូត ប៉ុន្តែការទូតនេះត្រូវតែគោរពនូវតួនាទីរបស់ប្រទេសទាំងអស់ ហើយគួរតែត្រូវបានអនុវត្តដោយឈរលើមូលដ្ឋាននៃសមភាព ខណៈយើងមិនឃើញគោលបំណងរបស់អ៊ុយក្រែនក្នុងការព្យាយាមស្វែងរកដំណោះស្រាយស្របច្បាប់ និងមានតុល្យភាពចំពោះបញ្ហានេះឡើយ” ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ មកស្គាល់បុរសខ្លាំង អ៊ុយក្រែន ពាក់មួក និងអាវសាមញ្ញ អង្គុយចរចាជាមួយ រុស្ស៊ី