ព័ត៌មានអន្ដរជាតិ

អ្វីជាគោលដៅដែល លោក ពូទីន ប្រាប់លោក Macron ថា រុស្ស៊ីនឹងជោគជ័យនៅអ៊ុយក្រែន?

បានផុស

៤ years មុន

នៅ

ថ្ងៃសុក្រ ៤ មីនា ២០២២

ដោយ

ប្រធានាធិបតីរុស្ស៊ី លោក វ្លាឌីមៀរ ពូទីន បានប្រាប់ប្រធានាធិបតីបារាំង Emmanuel Macron កាលពីថ្ងៃព្រហស្បតិ៍ថា រុស្ស៊ីនឹងសម្រេចគោលដៅពីប្រតិបត្តិការយោធារបស់ខ្លួននៅក្នុងប្រទេសអ៊ុយក្រែន ទោះមានអ្វីកើតឡើងក៏ដោយ។

ក្នុងសេចក្តីថ្លែងការណ៍មួយបានចេញផ្សាយដោយវិមានក្រឹមឡាំង បន្ទាប់ពីប្រធានាធិបតីបារាំង និងរុស្ស៊ីបាននិយាយគ្នាតាមទូរសព្ទ វិមានក្រឹមឡាំងបានធ្វើការបញ្ជាក់យ៉ាងច្បាស់ពីគោលដៅរបស់ខ្លួនរាប់ទាំងការធ្វើឲ្យគ្មានយោធា និងអ៊ុយក្រែនមានអព្យាក្រឹតភាព។

លោក ពូទីន និងលោក Macron ពេលជួបគ្នាមុនសង្គ្រាមផ្ទុះឡើង

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍បាននិយាយថា ការប៉ុនប៉ងណាមួយដោយរដ្ឋាភិបាលក្រុងកៀវក្នុងការពន្យារពេលការចរចាវាងមន្ត្រីរុស្ស៊ី និងអ៊ុយក្រែននឹងនាំឲ្យទីក្រុងមូស្គូបន្ថែមការទាមទារទៀតចូលទៅក្នុងបញ្ជីទាមទារដែលខ្លួនបានបញ្ចេញរួចហើយ។

សេចក្តីថ្លែងការណ៍បានលើកឡើងថា ៖«លោកប្រធានាធិបតី វ្លាឌីមៀរ ពូទីន បានគូសបញ្ជាក់យ៉ាងពិស្តារពីវិធីសាស្ត្រ និងលក្ខន្តិកៈជាមូលដ្ឋាននៅក្នុងបរិបទនៃការចរចាជាមួយភាគីអ៊ុយក្រែន។ វាត្រូវបានបញ្ជាក់ថា ដំបូងឡើយ យើងកំពុងពិភាក្សាគ្នាអំពីការធ្វើឲ្យគ្មានយោធា និងអព្យាក្រឹតភាពរបស់អ៊ុយក្រែន ដូច្នេះការគំរាមកំហែងលើសហព័ន្ធរុស្ស៊ីនឹងមិនចេញពីទឹកដីខ្លួនឡើយ»។

«វាត្រូវបានសង្កត់ធ្ងន់ថា ភារកិច្ចនៃប្រតិបត្តិការយោធាពិសេសនឹងត្រូវបានបំពេញក្នុងព្រឹត្តិការណ៍ណាមួយហើយការប៉ុនប៉ងដើម្បីពន្យារពេលវេលា អំពីការចរចានឹងនាំឲ្យបន្ថែមនូវការទាមទារទៀតលើរដ្ឋាភិបាលក្រុងកៀវនៅក្នុងគោលជំហរចរចារបស់ពួកយើង»។ សេចក្តីថ្លែងការណ៍បានបញ្ជាក់។

សេចក្តីថ្លែងការណ៍បាននិយាយថា ប្រតិបត្តិការពិសេសរបស់រុស្ស៊ីនៅអ៊ុយក្រែនកំពុងដំណើរការស្របតាមផែនការ។ របាយការណ៍ដែលនិយាយថា កម្លាំងរុស្ស៊ីកំពុងទម្លាក់គ្រាប់បែកលើទីក្រុងកៀវគឺជាផ្នែកនៃយុទ្ធនាការណ៍ផ្សព្វផ្សាយព័ត៌មានមិនពិត និងបញ្ជាក់ថា កម្លាំងរុស្ស៊ីកំពុងធ្វើអ្វីគ្រប់យ៉ាងដើម្បីការពារជនស៊ីវិល។

រុស្ស៊ីបានហៅសកម្មភាពរបស់ខ្លួននៅអ៊ុយក្រែនថាជា«ប្រតិបត្តិការពិសេស»ដែលខ្លួននិយាយថា មិនមានផែនការដើម្បីដណ្តើមទឹកដីទេ ប៉ុន្តែដើម្បីបំផ្លាញសមត្ថភាពយោធារបស់ប្រទេសជិតខាងភាគខាងត្បូង និងគ្រប់គ្រងលើអ្វីដែលខ្លួនចាត់ទុកថាជាអ្នកជាតិនិយមដ៏គ្រោះថ្នាក់៕

ប្រែសម្រួល៖ វីរបុត្រ
ប្រភព៖ reuters

Related Topics:ប្រទេសរុស្ស៊ី