មេដឹកនាំអឺរ៉ុប៣ប្រទេស ធ្វើទស្សនកិច្ចយ៉ាងភ្ញាក់ផ្អើលនៅអ៊ុយក្រែន ក្នុងគោលបំណងធំមួយ

មេដឹកនាំអឺរ៉ុបចំនួនបីរូប​ បានធ្វើដំណើរទៅកាន់ទីក្រុង កៀវ កាលពីថ្ងៃអង្គារទី១៥ខែមីនា ដើម្បីបង្ហាញពីការគាំទ្ររបស់ប្លុកនេះចំពោះប្រទេសអ៊ុយក្រែន។

អ្នកទាំង៣ បានក្លាយជាឥស្សរជនបរទេសដំបូងគេ ដែលបានធ្វើទស្សនកិច្ចរដ្ឋធានីនេះ ចាប់តាំងពីសង្រ្គាមរបស់លោក Vladimir Putin ផ្ទុះឡើង។

នាយករដ្ឋមន្ត្រីសាធារណរដ្ឋឆែក ប៉ូឡូញ និងស្លូវេនី បានទៅដល់ទីក្រុង​ កៀវ ដោយរថភ្លើង មុនពេលជួបជាមួយប្រធានាធិបតីអ៊ុយក្រែន លោក Volodymyr Zelensky។

ប៉ូឡូញនិយាយថា ដំណើរដ៏គួរឲ្យភ្ញាក់ផ្អើលនេះ ត្រូវបានយល់ព្រមក្នុងកិច្ចប្រជុំរបស់មេដឹកនាំសហភាពអឺរ៉ុប នៅប្រទេសបារាំងកាលពីសប្តាហ៍មុន។

នាយករដ្ឋមន្ត្រីឆែក លោក Petr Fiala និយាយថា “គោលបំណងធំបំផុតនៃដំណើរទស្សនកិច្ចនេះ គឺដើម្បីបញ្ជាក់ពីការគាំទ្រជាក់ស្តែងរបស់សហភាពអឺរ៉ុបទាំងមូល ចំពោះអធិបតេយ្យភាព និងឯករាជ្យភាពរបស់អ៊ុយក្រែន។ ​គោល​បំណង​នៃ​ដំណើរ​ទស្សនកិច្ច​នេះ​ ក៏​ដើម្បី​បង្ហាញ​កញ្ចប់​ជំនួយ​ដ៏​ទូលំទូលាយ​សម្រាប់ប្រទេស​អ៊ុយក្រែន​ និងប្រជាជន​អ៊ុយក្រែន​ផង​ដែរ”។

ចំណែកលោក Mateusz Morawiecki នាយករដ្ឋមន្ត្រីប៉ូឡូញ ក៏បានសង្កត់ធ្ងន់ផងដែរ អំពីសារសំខាន់នៃដំណើរទស្សនកិច្ចនេះ។

លោកសរសេរនៅលើ Facebook ថា ដំណើរទស្សនកិច្ចនេះ ធ្វើឡើងនៅថ្ងៃទី២០នៃការវាយលុករបស់រុស្ស៊ីប្រឆាំងនឹងអ៊ុយក្រែន។ នៅ​ពេល​ឈាន​ដល់​ដំណាក់កាលបែប​នេះ​សម្រាប់​ពិភពលោក វា​ជា​កាតព្វកិច្ច​របស់​យើង​ដែល​ត្រូវ​បង្កើត​ប្រវត្តិសាស្ត្រ។ ព្រោះ​វា​មិន​មែន​អំពី​យើង​ទេ ប៉ុន្តែ​គឺ​អំពី​អនាគត​កូន​ចៅ​របស់​យើង ​ដែល​ស័ក្តិសមរស់​នៅ​ក្នុង​ពិភព​លោក​ដែល​គ្មាន​ការ​ជិះជាន់៕

ប្រែសម្រួល៖ Vann Vann

ប្រភព៖ Independent

ចុចអាន៖ អ៊ុយក្រែន អះអាងថា ទាហានរុស្ស៊ី ១៣ ៥០០នាក់ហើយ ត្រូវបានសម្លាប់