ក្រោយត្រូវព្យួរ ពេលនេះ រុស្ស៊ី សម្រេចចិត្ត ចាកចេញពីក្រុមប្រឹក្សាសិទ្ធិមនុស្ស តែម្តង

មហាសន្និបាតរបស់អង្គការសហប្រជាជាតិ បានបោះឆ្នោតដោយសំឡេង ៩៣ទល់នឹង ២៤ដើម្បីព្យួររុស្ស៊ី ពីក្រុមប្រឹក្សាសិទ្ធិមនុស្ស ខណៈមាន ៥៨ប្រទេស អនុបវាទ ក្នុងនោះមានកម្ពុជា ផងដែរ ជុំវិញការចោទប្រកាន់អំពីការរំលោភសិទ្ធិមនុស្សដ៏គួរឲ្យរន្ធត់ដោយទាហានរុស្ស៊ីនៅប្រទេស អ៊ុយក្រែន។

ថ្លែងបន្ទាប់ពីការបោះឆ្នោតនោះ ឯកអគ្គរដ្ឋទូតរងរបស់រុស្ស៊ីប្រចាំអង្គការសហប្រជាជាតិ លោក Gennady Kuzmin បានពណ៌នាចំណាត់ការនេះថាជា “ជំហានដែលមិនស្របច្បាប់ និងជាការជំរុញផ្នែកនយោបាយ” ហើយបន្ទាប់មកបានប្រកាសថា រុស្ស៊ីសម្រេចចិត្តចាកចេញពីក្រុមប្រឹក្សាសិទ្ធិមនុស្សទាំងស្រុង។

ស្របពេលជាមួយគ្នានោះដែ លោក Sergiy Kyslytsya ឯកអគ្គរដ្ឋទូតរបស់អ៊ុយក្រែន ប្រចាំអង្គការសហប្រជាជាតិបានប្រាប់អ្នកយកព័ត៌មានថា “អ្នកមិនបានដាក់ពាក្យលាលែងពីតំណែងរបស់អ្នកទេ រហូតដល់អ្នកត្រូវបានបណ្តេញចេញ”។

គួរបញ្ជាក់ថា ប្រទេសរុស្ស៊ីស្ថិតនៅក្នុងឆ្នាំទី២នៃអាណត្តិ៣ឆ្នាំរបស់ខ្លួន។ នៅក្រោមសេចក្តីសម្រេចកាលពីថ្ងៃព្រហស្បតិ៍ មហាសន្និបាតអាចយល់ព្រមនៅពេលក្រោយ ដើម្បីបញ្ចប់ការព្យួរនេះ។ ប៉ុន្តែ​ពេលនេះ រុស្ស៊ី​បាន​សម្រេចចិត្តលាលែង​ពី​ក្រុមប្រឹក្សាតែម្តង ដូច​សហរដ្ឋអាមេរិក​បានធ្វើ​កាលពី​ឆ្នាំ២០១៨ដែរ ជុំវិញ​អ្វី​ដែល​ខ្លួន​ហៅថា ជាការលម្អៀងដ៏​រ៉ាំរ៉ៃ​ប្រឆាំងនឹង​អ៊ីស្រាអែល និង​កង្វះ​កំណែទម្រង់៕

ប្រែសម្រួល៖ Vann Vann

ប្រភព៖ Reuters

ចុចអាន៖ ទាហានអ៊ុយក្រែន បាញ់សម្លាប់ទាហានរុស្ស៊ី ដែលខ្លួនចាប់បាន ក្រោយមានការចោទប្រកាន់អំពើឃោរឃៅស្រដៀងគ្នារបស់រុស្ស៊ីនៅ Bucha