គីម ជុងអ៊ុន បញ្ជាឲ្យអ្នកកើតកូវីដ ខ្ពុរមាត់ជាមួយទឹកអំបិល ដើម្បីព្យាបាល (មានវីដេអូ)

លោក គីម ជុងអ៊ុន បានប្រាប់អ្នកជំងឺកូវីដរបស់កូរ៉េខាងជើងឲ្យ ខ្ពុរមាត់ជាមួយទឹកអំបិល ដើម្បីព្យាបាលមេរោគនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីសប្តាហ៍មុន កូរ៉េខាងជើង បានទទួលស្គាល់ជាលើកដំបូង អំពីការផ្ទុះឡើងនៃជំងឺកូវីដ១៩ ខណៈក្រុមអ្នកជំនាញព្រមានថា វិបត្តិនេះអាចបំផ្លិចបំផ្លាញប្រទេសមួយ ដែលការផ្គត់ផ្គង់ផ្នែកវេជ្ជសាស្រ្តនៅមានកម្រិត និងគ្មានកម្មវិធីវ៉ាក់សាំង។

យោងតាមប្រព័ន្ធផ្សព្វផ្សាយរដ្ឋ, មនុស្សជាង១លាននាក់ បានធ្លាក់ខ្លួនឈឺដោយសារអ្វីដែលទីក្រុងព្យុងយ៉ាងកំពុងសំដៅថាជា “គ្រុនក្តៅ” ថ្វីបើមេដឹកនាំលោក គីម បញ្ជាឲ្យបិទប្រទេសក្នុងគោលបំណងដើម្បីបន្ថយការរីករាលដាលនៃមេរោគក៏ដោយ។

ទីភ្នាក់ងារព័ត៌មានរដ្ឋ KCNA បានរាយការណ៍ថា ថ្នាំដែលផលិតដោយរដ្ឋ មិនបានប្រគល់ទៅដល់មនុស្សឆាប់រហ័ស ឬត្រឹមត្រូវនោះទេ។

ដោយសារតែគ្មានយុទ្ធនាការចាក់ថ្នាំបង្ការទូទាំងប្រទេស និងកម្មវិធីព្យាបាលជំងឺកូវីដ១៩, ប្រព័ន្ធផ្សព្វផ្សាយរដ្ឋបានលើកទឹកចិត្តអ្នកជំងឺឲ្យប្រើថ្នាំបំបាត់ការឈឺចាប់ និងថ្នាំអង់ទីប៊ីយោទិច ក៏ដូចជាវិធីព្យាបាលតាមផ្ទះ ដូចជាខ្ពុរមាត់ជាមួយទឹកអំបិល ឬផឹកតែ Lonicera ឬតែស្លឹកផងដែរ។

ដោយឡែក ក្រសួងបង្រួបបង្រួមរបស់ទីក្រុងសេអ៊ូល ដែលទទួលខុសត្រូវចំពោះទំនាក់ទំនងឆ្លងព្រំដែន បាននិយាយថា ខ្លួនបានស្នើឲ្យមានកិច្ចពិភាក្សាកម្រិតការងារ ដើម្បីផ្តល់ការផ្គត់ផ្គង់ផ្នែកវេជ្ជសាស្រ្ត រួមទាំងវ៉ាក់សាំង ម៉ាស និងឧបករណ៍ធ្វើតេស្ត ព្រមទាំងកិច្ចសហប្រតិបត្តិការបច្ចេកទេសផងដែរ ប៉ុន្តែកូរ៉េខាងជើងមិនអើពើឡើយ។

សំណើនេះបានកើតឡើងភ្លាមៗ បន្ទាប់ពីប្រធានាធិបតីកូរ៉េខាងត្បូងលោក Yoon Suk-yeol និយាយថា លោកនឹងខិតខំដើម្បីជួយកូរ៉េខាងជើង ក្នុងការប្រយុទ្ធប្រឆាំងនឹងការរីករាលដាលកូវីដ។ កូរ៉េខាងត្បូង បានត្រៀមខ្លួនរួចជាស្រេចក្នុងការផ្តល់វ៉ាក់សាំងកូវីដ និងជំនួយផ្នែកវេជ្ជសាស្រ្តផ្សេងទៀត៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail, GBnews

ចុចអាន៖ កូរ៉េខាងជើង ប្រហែលមានអ្នកឆ្លងកូវីដ ជាង ១លានករណីឯណោះ