ស្រាវីស្គីដបធំជាងគេបំផុតលើពិភពលោក ដាក់ដេញថ្លៃហើយ

ស្រាវីស្គីដបដែលគេឲ្យឈ្មោះថា The Intrepid នឹងត្រូវដាក់ដេញថ្លៃតាមអ៊ីនធឺណិត នៅថ្ងៃទី ២៥ ខែឧសភា បន្ទាប់ពីទទួលការអនុញ្ញាតពីក្រុមហ៊ុនដេញថ្លៃអន្តរជាតិ Lyon & Turnbull។

ដបដាក់ស្រានេះ មានកម្ពស់ ១.៨ម៉ែត្រ ហើយផ្ទុកចំណុះបាន ៣១១លីត្រ ឬស្មើនឹងស្រា ៤៤៤ដប។ ពួកគេសង្ឃឹមថា ស្រានេះមិនត្រឹមតែជាស្រាដបធំជាងគេនៅលើភពផែនដីដូចដែលបានបញ្ជាក់ដោយ Guinness World Records កាលពីខែកញ្ញាឆ្នាំមុនប៉ុណ្ណោះទេ ប៉ុន្តែវាថែមទាំងជាស្រាដបមានតម្លៃថ្លៃបំផុតផងដែរ។

កំណត់ត្រាបច្ចុប្បន្ន ត្រូវបានកាន់កាប់ដោយស្រា The Macallan 1926 អាយុ ៦០ឆ្នាំដែលលក់ក្នុងតម្លៃ ១.៩លានដុល្លារអាមេរិកនៅឯការដេញថ្លៃ Sotheby’s ក្នុងឆ្នាំ ២០១៩។

យោងតាម Lyon & Turnbull, មួយភាគបួននៃការលក់ណាមួយលើសពីគោលដៅ ១.៦២លានដុល្លារ នឹងត្រូវបានបរិច្ចាគទៅឲ្យអង្គការសប្បុរសធម៌ Marie Curie ដែលជាអង្គការមើលថែអ្នកជំងឺដំណាក់កាលចុងក្រោយ។

ស្រា The Intrepid ដែលត្រូវបានបង្កើតឡើងក្នុងភាពជាដៃគូរវាងក្រុមហ៊ុនវិនិយោគ Fah Mai Holdings Group និង Rosewin Holdings ត្រូវបានគេដាក់ឈ្មោះដើម្បីជាការគោរពចំពោះអ្នករុករកកំពូលទាំង ១១ របស់ពិភពលោក រួមមានជនជាតិអង់គ្លេសលោក Sir Ranulph Fiennes ផងដែរ ដែលលោកជាមនុស្សដំបូង ឆ្លងកាត់ទ្វីបអង់តាក់ទិកដោយថ្មើរជើង និងលោកវេជ្ជបណ្ឌិត Geoff Wilson ដែលជាអ្នករុករកតំបន់ប៉ូលដ៏ល្បីល្បាញម្នាក់ទៀតដែលមកពីប្រទេសអូស្ត្រាលី៕

ប្រែសម្រួល៖ សន្យា

ប្រភព៖ Asian One