រុស្ស៊ី ប្រកាសជ័យជម្នះទាំងស្រុង នៅរោងចក្រដែក Azovstal ក្នុងទីក្រុង Mariupol

រុស្ស៊ី​ បាន​ប្រកាស​ជ័យ​ជម្នះ​ក្នុង​សមរភូមិ​​រយៈពេល​ច្រើន​ខែ ​ដើម្បី​ដណ្តើម​យក​ក្រុង​កំពង់ផែ Mariupol របស់ប្រទេស​អ៊ុយក្រែន។

មន្ត្រីក្រុងមូស្គូនិយាយថា អ្នកប្រយុទ្ធចុងក្រោយដែលការពាររោងចក្រដែក Azovstal ពេលនេះបានចុះចាញ់ហើយ។

អស់រយៈពេលជាច្រើនខែមកនេះ ទាហានត្រូវបានបង្ខាំងនៅទីនោះ ដោយរារាំងរុស្ស៊ីមិនឲ្យដាក់ការគ្រប់គ្រងទាំងស្រុងលើទីក្រុង Mariupol។

ការជម្លៀសកាលពីថ្ងៃសុក្រទី២០ខែឧសភា គឺកត់សម្គាល់ជាការបញ្ចប់នៃការឡោមព័ទ្ធដ៏បំផ្លិចបំផ្លាញបំផុតនៃសង្រ្គាម ដោយបច្ចុប្បន្ន ទីក្រុង Mariupol ត្រូវខ្ទេចខ្ទីទាំងស្រុង។

ក្រសួងការពារជាតិរុស្ស៊ីនិយាយថា ទីក្រុង និងរោងចក្រដែកឥឡូវនេះ ត្រូវបានរំដោះទាំងស្រុងហើយ បន្ទាប់ពីទាហានអ៊ុយក្រែនចំនួន ៥៣១ នាក់បានចាកចេញពីទីតាំងនោះ។

គួរបញ្ជាក់ថា អស់រយៈពេលជាច្រើនសប្តាហ៍ រោងចក្រដែក Azovstal ត្រូវបានឡោមព័ទ្ធទាំងស្រុង។

កងកម្លាំងរុស្ស៊ីបានរារាំងជំនួយមនុស្សធម៌ទាំងអស់មិនឲ្យចូល ដោយទម្លាក់គ្រាប់បែក និងទាមទារឲ្យអ្នកការពារនៅសេសសល់ ទម្លាក់អាវុធចុះ។

ភាគច្រើននៃអ្នកដែលជាប់នៅខាងក្នុងគឺជាជនស៊ីវិល រួមទាំងស្ត្រី កុមារ និងមនុស្សចាស់ផងដែរ។ កាលពីដើមខែនេះ ពួកគេត្រូវបានជម្លៀសចេញទាំងស្រុង បន្ទាប់ពីមានការចរចាយ៉ាងយកចិត្តទុកដាក់ ដែលសម្របសម្រួលដោយអង្គការសហប្រជាជាតិ និងកាកបាទក្រហម។

ប៉ុន្តែ​ការ​បន្ត​បដិសេធ​របស់​អ្នក​ការពារ​អ៊ុយក្រែន មិនព្រម​ចុះចាញ់បាន​ន័យ​ថា ​រុស្ស៊ី​មិន​អាច​បញ្ជា​ការ​គ្រប់​គ្រង​ទាំង​ស្រុង​លើ​ទីក្រុង​កំពង់ផែ​យុទ្ធសាស្ត្រមួយនេះបានទេ។

សម្រាប់ប្រជាជនអ៊ុយក្រែនបានចាត់ទុកថា អ្នកការពាររោងចក្រ Azovstal គឺជាវីរបុរសជាតិ និងជានិមិត្តរូបនៃការតស៊ូរបស់ប្រទេស៕

ប្រែសម្រួល៖ Vann Vann

ប្រភព៖ BBC

ចុចអាន៖ រុស្ស៊ី បង្ហាញលក្ខខណ្ឌ បើចង់ឲ្យបើកច្រកកំពង់ផែ អ៊ុយក្រែន នាំចេញទំនិញ