ទីបំផុត កូរ៉េខាងជើង ចាប់ផ្ដើមចាក់វ៉ាក់សាំងកូវីដហើយ

ប្រទេសកូរ៉េខាងជើងដែលកំពុងរងគ្រោះដោយជំងឺកូវីដ ១៩ បានចាប់ផ្តើមយុទ្ធនាការចាក់វ៉ាក់សាំងរបស់ខ្លួនហើយ ខណៈមេដឹកនាំប្រទេសលោក គីម ជុងអ៊ុន បានហៅព្រឹត្តិការណ៍នេះថាជា “ឱសថអមតៈ” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយដកស្រង់ប្រភពពីប្រព័ន្ធផ្សព្វផ្សាយមិនស្វែងរកប្រាក់ចំណេញរបស់អាមេរិក, វិទ្យុ RFA បានរាយការណ៍ថា ទោះបីជាយ៉ាងណាក៏ដោយ រហូតមកដល់ពេលនេះ វ៉ាក់សាំងត្រូវបានត្រៀមចាក់សម្រាប់តែទាហានដែលធ្វើការលើគម្រោងកសាងប្រទេសជាតិប៉ុណ្ណោះ ។

មន្ត្រីរដ្ឋាភិបាលដែលមិនបញ្ចេញឈ្មោះបានប្រាប់ RFA ថា “ទាហានទាំងនោះបានចាក់វ៉ាក់សាំងកូវីដនាំចូលពីប្រទេសចិន ប៉ុន្តែបានបដិសេធមិនបញ្ជាក់ពីប្រភេទ ឬឈ្មោះវ៉ាក់សាំងនោះឡើយ” ។

យោងតាមសារព័ត៌មាន AP បានចុះផ្សាយថា កូរ៉េខាងជើងបានបញ្ជាក់ពីករណីឆ្លងកូវីដលើកដំបូងនៅថ្ងៃទី ១២ ខែឧសភា ហើយលោក គីម បានរិះគន់មន្ត្រីរបស់គាត់ចំពោះការឆ្លើយតបមិនល្អ និងយឺតយ៉ាវរបស់ប្រទេសចំពោះមេរោគនេះ ។ ទោះបីជាយ៉ាងណាក៏ដោយ ក្នុងរយៈពេលប៉ុន្មានថ្ងៃនេះ ប្រព័ន្ធផ្សព្វផ្សាយរដ្ឋរបស់កូរ៉េខាងជើងបានរាយការណ៍ថា រលកឆ្លងកូវីដនៅក្នុងប្រទេសក៏កំពុងធ្លាក់ចុះវិញផងដែរ ។

យោងតាមទីភ្នាក់ងារសារព័ត៌មានរដ្ឋ KCNA បានឲ្យដឹងថា បច្ចុប្បន្នកូរ៉េខាងជើងមិនបានចាត់ទុកការផ្ទុះជំងឺគ្រុនក្ដៅថាជាកូវីដឡើយ ប៉ុន្តែគិតត្រឹមពេលនេះចំនួនសរុបនៃអ្នកចេញអាការគ្រុនក្តៅនៅក្នុងប្រទេសបានកើនឡើងដល់ ៣.៧ លាននាក់ ខណៈក៏មានមនុស្ស ៧០ នាក់បានស្លាប់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Business Insider

ចុចអាន ៖ ចិន នាំចេញប្រេងចម្រាញ់រាប់ពាន់តោនទៅ កូរ៉េខាងជើង