កូរ៉េខាងជើង បើកសម័យប្រជុំការិយាល័យនយោបាយ តែបាត់មុខលោក គីម ជុងអ៊ុន

ប្រទេសកូរ៉េខាងជើងបានបើកកិច្ចប្រជុំការិយាល័យនយោបាយរបស់គណបក្សកម្មករដែលកំពុងកាន់អំណាច ប៉ុន្តែមិនមានវត្តមានមេដឹកនាំលោក គីម ជុងអ៊ុន ចូលរួមក្នុងកិច្ចប្រជុំនេះនោះទេ ។

បើយោងតាមទីភ្នាក់ងារសារព័ត៌មានកូរ៉េ (KCNA) បានរាយការណ៍ថា ជំនួសមុខលោក គីម, លោក Jo Yong-won ជាលេខាធិការទទួលបន្ទុកកិច្ចការរៀបចំរបស់គណៈកម្មាធិការមជ្ឈិមបក្សពលករបានធ្វើជាអធិបតីក្នុងកិច្ចប្រជុំការិយាល័យនយោបាយ ដែលធ្វើឡើងកាលពីថ្ងៃអង្គារ ហើយបានសម្រេចលើរបៀបវារៈដែលនឹងលើកយកមកពិភាក្សានៅក្នុងកិច្ចប្រជុំពេញអង្គនាពេលខាងមុខ ។

ទន្ទឹមនោះប្រព័ន្ធផ្សព្វផ្សាយរដ្ឋរបស់កូរ៉េខាងជើងមិនទាន់បានរាយការណ៍ថា នៅពេលណាដែលកិច្ចប្រជុំពេញអង្គនឹងត្រូវធ្វើឡើងនោះទេ ប៉ុន្តែសម័យប្រជុំកាលពីថ្ងៃអង្គារបង្ហាញថា កិច្ចប្រជុំគឺជិតមកដល់ហើយ ។

គួរបញ្ជាក់ថា សម័យប្រជុំពេញអង្គនាពេលខាងមុខរបស់កូរ៉េខាងជើងអាចនឹងលើកយកបញ្ហាសំខាន់ៗជាច្រើនដូចជា ការជាប់គាំងកិច្ចចរចានុយក្លេអ៊ែរជាមួយសហរដ្ឋអាមេរិក ក៏ដូចជាវិបត្តិកូវីដ ១៩ និងសញ្ញានៃការសាកល្បងនុយក្លេអ៊ែរដែលអាចកើតមានជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Yonhap

ចុចអាន ៖ កូរ៉េខាងត្បូង និងអាមេរិក បាញ់មីស៊ីល ៨ គ្រាប់ ឌឺ កូរ៉េខាងជើង វិញ (មានវីដេអូ)