ប្រទេស ណាតូ មួយនេះមិនចូលរួមដាក់ទណ្ឌកម្មប្រឆាំង រុស្ស៊ី ដាច់ខាត

ប្រធានាធិបតីតួកគីលោក Tayyip Erdogan បានប្រាប់អ្នកយកព័ត៌មានតួកគីនៅលើជើងហោះហើរត្រឡប់ពីកិច្ចប្រជុំកំពូលអង្គការណាតូថា អាជ្ញាធរតួកគីនឹងមិនអាចចូលរួមក្នុងការដាក់ទណ្ឌកម្មប្រឆាំងរុស្ស៊ីបានទេ ដោយសារតែទីក្រុងអង់ការ៉ាមិនអាចឲ្យពលរដ្ឋរបស់ខ្លួនគ្មានឧស្ម័នរុស្ស៊ីប្រើប្រាស់ឡើយ ។

លោក Erdogan បានប្រាប់កាសែត Hurriyet ថា “ទាក់ទងនឹងការដាក់ទណ្ឌកម្ម យើងកំពុងសិក្សាគោលការណ៍ណែនាំមួយចំនួនរបស់អង្គការសហប្រជាជាតិ ប៉ុន្តែកុំភ្លេចថា យើងមិនអាចចោលទំនាក់ទំនងរបស់យើងជាមួយរុស្ស៊ីបាននោះទេ ជាពិសេសយើងកំពុងប្រើប្រាស់ឧស្ម័នពីរុស្ស៊ី” ។

លោកប្រធានាធិបតីបញ្ជាក់ថា “ឧស្ម័នធម្មជាតិដែលយើងប្រើប្រាស់បានមកពីប្រទេសរុស្ស៊ី ក្រៅពីនោះ យើងក៏កំពុងសាងសង់រោងចក្រថាមពលនុយក្លេអ៊ែរ Akkuyu របស់យើងជាមួយប្រទេសរុស្ស៊ីផងដែរ ។ យើងត្រូវការពារប្រជាជនរបស់យើង ទី១ ខ្ញុំមិនអាចទុកពលរដ្ឋរបស់ខ្ញុំឲ្យកកក្នុងរដូវរងាទេ ហើយទី២ ខ្ញុំមិនអាចចាប់ផ្តើមឧស្សាហកម្មរបស់យើងឡើងវិញទាំងស្រុងបានភ្លាមៗនោះទេ” ។

លោក Erdogan បានរំលឹកឡើងវិញថា “អាជ្ញាធរសាធារណៈរដ្ឋគួរតែការពារពលរដ្ឋរបស់ពួកគេ ។ យើងមានប្រទេសមួយដែលមានប្រជាជនចំនួន ៨៥ លាននាក់ ហើយមានកាតព្វកិច្ចគ្រប់បែបយ៉ាងដើម្បីការពារពួកគេ ។ លើសពីនេះ យើងក៏បានបញ្ជូនឡានដឹកទំនិញចំនួន ៥៦ គ្រឿងជាមួយនឹងជំនួយមនុស្សធម៌ដល់ប្រជាជនអ៊ុយក្រែនផងដែរ ហើយយើងក៏ផ្គត់ផ្គង់ពួកគេទាំងអាហារ សំលៀកបំពាក់ និងឱសថជាដើម” ។

ជាចុងក្រោយទីក្រុងអង់ការ៉ាបាននិយាយម្តងហើយម្តងទៀតថា តួកគីមិនមានចេតនាចូលរួមក្នុងការដាក់ទណ្ឌកម្មប្រឆាំងនឹងរុស្ស៊ីទេដើម្បីកុំឲ្យខូចសេដ្ឋកិច្ចផ្ទាល់ខ្លួន ហើយក៏ទុកច្រកបើកចំហនៃការសន្ទនាជាមួយសហព័ន្ធរុស្ស៊ីផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ អ្នកចង់ចុះឈ្មោះចូលប្រយុទ្ធឲ្យ រុស្ស៊ី នៅ អ៊ុយក្រែន ត្រូវធ្វើតាមលក្ខខណ្ឌ ៣ យ៉ាងនេះ