ផ្ទុះកុបកម្មនៅពន្ធនាគារ កូឡុំប៊ី ស្លាប់អ្នកទោស ៥២ នាក់

ទីភ្នាក់ងារពន្ធនាគារជាតិ បានឲ្យដឹងថា អ្នកទោសចំនួន៥២នាក់ត្រូវបានសម្លាប់ និង២៦នាក់ទៀតរងរបួសកាលពីថ្ងៃអង្គារទី២៨ខែមិថុនា បន្ទាប់ពីអគ្គិភ័យ បានឆាបឆេះអំឡុងពេលផ្ទុះកុបកម្មក្នុងពន្ធនាគារនៅភាគនិរតី ប្រទេសកូឡុំប៊ី។

លោក Tito Castellanos នាយកទីភ្នាក់ងារ National Penitentiary and Prison Institute (INPEC) បាននិយាយថា សោកនាដកម្មនេះ កើតឡើងនៅពេលអ្នកទោសប្រយុទ្ធគ្នា បង្កឲ្យមានអគ្គិភ័យនៅម៉ោងប្រហែល ២ទៀបភ្លឺ ខណៈព្យាយាមរារាំងប៉ូលិសមិនឲ្យចូលទៅក្នុងពន្ធនាគារនៅក្នុងទីក្រុង Tulua។

ស្របពេលជាមួយគ្នានោះដែរ លោកស្រី Cristina Lesmes ប្រធានផ្នែកសុខភាពនៅទីក្រុង Valle del Cauca បាននិយាយនៅលើ Twitter ថា “យើងបានព្យាបាលអ្នករបួសសរុប ២៦ នាក់ ហើយចំនួនអ្នកស្លាប់គឺ ៥២នាក់។ មានអ្នករបួស​ធ្ងន់ធ្ងរ ជាមួយ​ការ​រលាក​យ៉ាង​ខ្លាំង​”។

ពន្ធនាគារ​ដែល​ផ្ទុក​អ្នក​ទោស​ជាង ​១២០០​នាក់ ​ត្រូវ​បាន​ឡោមព័ទ្ធ​ដោយ​ប៉ូលិស​និង​ទាហាន ខណៈអគ្គិភ័យ​ ​ត្រូវ​បាន​ក្រុម​ពន្លត់​អគ្គិភ័យ​គ្រប់គ្រង​បាន​ហើយ។

​ដល់ពេល​ល្ងាច ក្រុម​ធ្វើ​កោសល្យ​វិ​ច្ច័​យ​បាន​ចុះ​ទៅ​ដល់​ពន្ធនាគារ ដើម្បីពិនិត្យអត្តសញ្ញាណ។

អាជ្ញាធរ​​និយាយ​ពីដំបូង​ថា ​ពួកគេ​កំពុង​ស៊ើបអង្កេត​ថាតើ​ឧបទ្ទវហេតុ​នេះ​បាន​កើត​ឡើង​ជា​ផ្នែក​មួយ​នៃ​ការ​ប៉ុនប៉ង​ហែកគុកមែនឬទេ ប៉ុន្តែ​ក្រោយមក​បាន​និយាយ​ថា​ វា​ជា​កុបកម្ម៕

ប្រែសម្រួល៖ Vann Vann

ប្រភព៖ CNA

ចុចអាន៖ ថតជាប់ស្តែងៗ បាក់កន្លែងអង្គុយទស្សនាការប្រកួតគោជល់នៅ កូឡុំប៊ី ស្លាប់មនុស្ស ៤នាក់ របួសជាង ៣០០នាក់