បារាំង បដិសេធ រឿងបិទបណ្តាញសង្គម ដើម្បីគ្រប់គ្រងកុបកម្ម

រដ្ឋាភិបាលបារាំង បានចេញមុខបដិសេធ លើការបិទសេវាអ៊ីនធឺណិត នៅតំបន់មួយចំនួន ដើម្បីទប់ស្កាត់ការរីករាលដាលនៃកុបកម្មហិង្សា ដោយចាត់ទុកថា នោះគឺជាព័ត៌មានមិនពិត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក្យចចាមអារ៉ាមនេះ កើតឡើងស្របពេលកុបកម្មទូទាំងប្រទេសបារាំង នៅតែពុះកញ្ជ្រោល ខណៈប៉ូលិសរាប់ម៉ឺននាក់ ត្រូវបានដាក់ពង្រាយ បន្ទាប់ពីពិធីបុណ្យសពរបស់ក្មេងជំទង់ ដែលត្រូវប៉ូលិសបាញ់សម្លាប់ ព្រោះតែមិនគោរពច្បាប់ចរាចរណ៍ ។

ចាប់តាំងពីការស្លាប់យុវជនឈ្មោះ​ Nahel អាយុ១៧ឆ្នាំនៅទីក្រុង Nanterre ក្រុមកុបកម្ម បានដុតរថយន្តនិងប្លន់ហាងនានា ថែមទាំងប៉ុនប៉ងចូលធ្វើឃាតចៅហ្វាយក្រុងមួយរូបដល់ក្នុងផ្ទះទៀតផង ។

ក្រោយមក លោកប្រធានាធិបតី Emmanuel Macron បានពន្យារពេលដំណើរទស្សនកិច្ចផ្លូវរដ្ឋទៅកាន់ប្រទេសអាល្លឺម៉ង់ ដើម្បីដោះស្រាយវិបត្តិដ៏អាក្រក់បំផុត ចាប់តាំងពីបាតុកម្ម “”អាវកាក់ពណ៌លឿង” ដែលធ្វើឲ្យផ្នែកមួយចំនួននៃប្រទេសបារាំង​ ត្រូវជាប់គាំង កាលពីចុងឆ្នាំ២០១៨។

យ៉ាងណាក្តី កុបកម្មបានរីករាលដាលដល់ប្រទេសក្រៅទៅទៀត ដោយនៅទីក្រុងព្រុចសែល នៃប្រទេសបែលហ្ស៊ិក បាតុករបានស្រែករកយុត្តិធម៌ឲ្យយុវជន Nahel ចំណែកនៅទីក្រុង ឡូសាន នៃប្រទេសស្វីសវិញ បាតុករនាំគ្នាគប់គ្រាប់បែកសាំង ។

ប៉ូលិសនៅទីក្រុង ឡូសាន និយាយថា “ដោយសារតែព្រឹត្តិការណ៍និងកុបកម្មកំពុងឆាបឆេះ ក្នុងប្រទេសបារាំង យុវជនជាងមួយរយនាក់ បានប្រមូលផ្តុំគ្នានៅកណ្តាលទីក្រុង ឡូសាន និងថែមទាំងកម្ទេចហាងនានា ហើយបន្ទាប់ពីកុបកម្មនោះ ប៉ូលិសបានចាប់ខ្លួនមនុស្សចំនួន ៧ នាក់ដែលមានអាយុចន្លោះពី ១៥ ទៅ ១៧ ឆ្នាំ និងមានអាយុ ២៤ ឆ្នាំម្នាក់ផងដែរ”។

ស្របពេលជាមួយគ្នានោះ ក៏មានការចាប់ខ្លួនផងដែរនៅក្នុងទីក្រុងព្រុចសែល នៃប្រទេសបែលហ្សិក បន្ទាប់ពីមានការរំខានស្រដៀងគ្នានេះ៕

ប្រែសម្រួល៖ Vann Vann

ប្រភព៖ Samaa

ចុចអាន៖ កុបកម្មនៅបារាំង រាលដាលដល់ប្រទេស២ទៀត ក្នុងទ្វីបអឺរ៉ុប