មនុស្សរាប់ពាន់នាក់របួស ក្នុងភាពចលាចលនៅ អ៊ូសបេគីស្ថាន

មន្ត្រីក្នុងតំបន់ Karakalpakstan នៃប្រទេស អ៊ូសបេគីស្ថាន បាននិយាយថា មនុស្សរាប់ពាន់នាក់កំពុងទទួលការព្យាបាលនៅក្នុងមន្ទីរពេទ្យ បន្ទាប់ពីរងរបួសអំឡុងពេលមានភាពចលាចល កាលពីចុងសប្តាហ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីសុខាភិបាលក្នុងតំបន់បាននិយាយថា មន្ទីរពេទ្យក្នុងក្រុង Nukus នៃតំបន់ Karakalpakstan គឺពោរពេញទៅដោយអ្នកជំងឺ។

ការប៉ះទង្គិចជាមួយកងកម្លាំងសន្តិសុខបានផ្ទុះឡើង នៅពេលក្រុមអ្នកតវ៉ា ចេញមកប្រមូលផ្តុំគ្នាតាមដងផ្លូវ ជុំវិញផែនការដកសិទ្ធិឯករាជ្យរបស់ដែនដីស្វយ័តមួយនេះ។

ឥឡូវ លោកប្រធានាធិបតី Shavkat Mirziyoyev និយាយថា ផែនការនឹងមិនត្រូវបានអនុវត្តទេ។ ប៉ុន្តែនៅក្នុងកិច្ចប្រជុំជាមួយសមាជិកសភាក្នុងតំបន់កាលពីថ្ងៃអាទិត្យ លោកបានចោទប្រកាន់អ្វីដែលលោកហៅថា ជាកងកម្លាំងព្យាបាទ ថាកំពុងព្យាយាមបង្កអស្ថិរភាព និងធ្វើឲ្យប៉ះពាល់ដល់ស្ថានភាពនៅក្នុងរដ្ឋអាស៊ីកណ្តាលមួយនេះ។

ស្របពេលជាមួយគ្នានោះ លោក​បាន​ចោទ​អ្នក​រៀបចំបាតុកម្ម​ថា ​បាន​ព្យាយាម​រឹបអូស​អគារ​របស់​រដ្ឋាភិបាល​ក្នុង​តំបន់ ដើម្បី​យក​អាវុធ។

លោក​ត្រូវ​បាន​គេ​ដក​ស្រង់​សម្តី​ដោយ​ទីភ្នាក់ងារ​ព័ត៌មាន AFP ថា “បាតុករ ​បាន​វាយ​ប្រហារ​មន្ត្រី​អនុវត្ត​ច្បាប់ ដោយ​វាយ​ដំ​ពួក​គេ​យ៉ាង​ធ្ងន់ធ្ងរ និង​បណ្ដាល​ឲ្យ​រង​របួស​ធ្ងន់ធ្ងរ”។

គួរបញ្ជាក់ថា អ៊ូសបេគីស្ថាន មានកេរ្តិ៍ឈ្មោះ ជាសាធារណរដ្ឋគាបសង្កត់បំផុតក្នុងចំណោមអតីតសហភាពសូវៀតផ្សេងទៀត ដោយមានការគៀបសង្កត់លើការប្រឆាំងគ្រប់ទម្រង់៕

ប្រែសម្រួល៖ Vann Vann

ប្រភព៖ BBC

ចុចអាន៖ អាមេរិកជម្លៀសយោធា និងជនស៊ីវិល អាហ្វហ្គានីស្ថាន ជិត ៥០០ នាក់ចេញពី អ៊ូសបេគីស្ថាន