រុស្ស៊ី ថា លោកខាងលិចចង់ប្រែក្លាយ អ៊ុយក្រែន ទៅជា “រដ្ឋណាស៊ីថ្មី”

រដ្ឋមន្ត្រីការបរទេសរបស់រុស្ស៊ីលោក Sergei Lavrov បាននិយាយថា ប្រទេសលោកខាងលិចកំពុងស្វែងរកការប្រែក្លាយអ៊ុយក្រែនទៅជា “រដ្ឋណាស៊ីថ្មី ឬ neo-Nazi” ដោយបើកចំហដើម្បីដាក់កន្លែងឈរជើងយោធា ។

ថ្លែងទៅកាន់មេដឹកនាំម៉ុងហ្គោលីយ៉ាងលម្អិតអំពីអ្វីដែលវិមានក្រឹមឡាំងហៅថា “ប្រតិបត្តិការយោធាពិសេស” នៅអ៊ុយក្រែន, លោក Lavrov បាននិយាយថា បណ្ដាប្រទេសលោកខាងលិចក៏កំពុងនាំអ៊ុយក្រែនចូលទៅក្នុងគោលនយោបាយ Russophobic ដែលនឹងគំរាមកំហែងដល់សន្តិសុខរបស់រុស្ស៊ី ។

លោក Lavrov បាននិយាយថា “យើងចាប់អារម្មណ៍អំពីរបៀបដែលអ្នកតំណាងនៃរដ្ឋាភិបាលទីក្រុងកៀវកំពុងប្រព្រឹត្ត និងបន្តអាកប្បកិរិយានៅក្នុងប្រទេសអ៊ុយក្រែន ហើយយើងនឹងបង្ហាញការពិតដល់សហគមន៍ពិភពលោក” ។

លោកបាននិយាយថា “ជាអកុសលលោកខាងលិចកំពុងធ្វើអ្វីគ្រប់យ៉ាងដើម្បីរារាំងការងាររបស់ប្រព័ន្ធផ្សព្វផ្សាយ ដែលផ្តល់ព័ត៌មានក្នុងគោលបំណងបង្ហាញការពិតអំពីអ្វីដែលកំពុងកើតឡើងនៅក្នុងប្រទេសអ៊ុយក្រែន” ។

ជាចុងក្រោយលោករដ្ឋមន្ត្រីការបរទេស Sergei Lavrov ក៏បានអំពាវនាវឲ្យភាគីទាំងអស់ក្នុងពិភពលោកខិតខំប្រឹងប្រែងដើម្បីការពារច្បាប់អន្តរជាតិ ខណៈដែលពិភពលោកកំពុងវិវឌ្ឍន៍ក្នុងលក្ខណៈស្មុគស្មាញបំផុត ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ អ៊ុយក្រែន ប្រកាសផែនការ ៣ ដំណាក់កាលស្ដារប្រទេសឡើងវិញ