កាសែត New York Times ៖ អាមេរិក និងសម្ព័ន្ធមិត្ត ជិតអស់ជំនួយគាំទ្រដល់ អ៊ុយក្រែន ហើយ (មានវីដេអូ)

កាសែត The New York Times រាយការណ៍ថា សហរដ្ឋអាមេរិក និងសម្ព័ន្ធមិត្តជិតអស់ជំនួយគាំទ្រដល់អ៊ុយក្រែនហើយ ហើយនឹងមិនអាចរក្សាកម្រិតនៃការគាំទ្រនាពេលបច្ចុប្បន្នរបស់ពួកគេទៅដល់រដ្ឋាភិបាលទីក្រុងកៀវសម្រាប់រយៈពេលដ៏យូរទៀតនោះទេ ។

កាសែតបានចុះផ្សាយទៀតថា ថ្មីៗនេះប្រធានាធិបតីសហរដ្ឋអាមេរិកលោក ចូ បៃដិន បានប្រកាសពីការផ្ដល់ជំនួយយោធាថ្មីចំនួន ៤០០ លានដុល្លារបន្ថែមទៀត ក៏ដូចជាប្ដេជ្ញានឹងឈរជាមួយអ៊ុយក្រែនជារៀងរហូតតាមដែលអាចធ្វើទៅបាន ។ ប៉ុន្តែគ្មាននរណាម្នាក់រំពឹងថា អាមេរិកនឹងមានការគាំទ្រនូវទឹកប្រាក់រាប់ពាន់លានដុល្លារដល់អ៊ុយក្រែនទៀតនោះទេ នៅពេលដែលកញ្ចប់ជំនួយផ្នែកយោធា និងជំនួយផ្សេងទៀតរបស់ទីក្រុងវ៉ាស៊ីនតោនដែលកំណត់ក្នុងទំហំទឹកប្រាក់ ៥៤ ពាន់លានដុល្លារ អស់ពីឃ្លាំងនោះ ។

ទន្ទឹមនោះក្រុមមន្ត្រីបានសារភាពប្រាប់កាសែត The New York Times ថា ស្តុកអាវុធរបស់អាមេរិក និងអឺរ៉ុបនឹងធ្លាក់ចុះ ហើយអស់ពីឃ្លាំងនៅពេលណាមួយ ហើយវាក៏នឹងពិបាកសម្រាប់ការផ្គត់ផ្គង់ក្នុងកម្រិតកំណត់ បន្ទាប់ពីជំនួយយោធាសម្រាប់អ៊ុយក្រែនដែលអនុម័តដោយសភាអាមេរិក មានរយៈពេលរហូតដល់ត្រីមាសទី ២ នៃឆ្នាំក្រោយ ។

គួររំឭកថា ប្រទេសរុស្ស៊ីបានចាប់ផ្តើមប្រតិបត្តិការយោធាពិសេសរបស់ខ្លួននៅក្នុងប្រទេសអ៊ុយក្រែនកាលថ្ងៃទី ២៤ ខែកុម្ភៈ បន្ទាប់ពីសាធារណរដ្ឋប្រជាមានិត Donetsk និង Luhansk បានអំពាវនាវសុំជំនួយក្នុងការការពារខ្លួនប្រឆាំងនឹងការបង្កហេតុរបស់អ៊ុយក្រែន ។

ជាការឆ្លើយតបទៅនឹងប្រតិបត្តិការរបស់រុស្ស៊ី បណ្តាប្រទេសលោកខាងលិចបានដាក់ចេញនូវយុទ្ធនាការដាក់ទណ្ឌកម្មទ្រង់ទ្រាយធំប្រឆាំងនឹងទីក្រុងមូស្គូ ហើយបាននិងកំពុងផ្គត់ផ្គង់អាវុធដល់អ៊ុយក្រែនផងដែរ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក ផ្ដល់ជំនួយយោធាថ្មីរាប់លានដុល្លារទៀតឲ្យ អ៊ុយក្រែន